新車速報：<br>日產March四個版本任你揀

新車速報：
日產March四個版本任你揀

日產March自推出以來，一直憑着頗Cute嘅賣相而備受追捧；而代理方面為吸引車迷，更特別為March包裝出四個擁有不同性格嘅特別版畀你揀，當中包括有跑格十足嘅RallyMarch及AeroMarch、簡單就是美嘅MarchCup，同埋最啱「好色」車迷嘅ColourfulMarch，梗有一款啱你口味㗎！

記者：何永仁　攝影：陳偉強　ImageGirl：Clara

ColourfulMarch　
最啱「好色」車迷
若然你係一位「好色」（喜歡色彩斑斕配搭）嘅車主，咁就可以選擇呢款ColourfulMarch特別版；你不但可將鬼面罩改換上自己喜歡嘅顏色外，就連門邊鏡殼、車尾泵把及泵把角位保護邊，甚至係車身防撞膠邊，都可以選用自己嘅心水配搭，咁你想部車唔襯自己嘅Style都幾難啦！

■無論係門邊鏡殼、車身防撞膠邊及尾泵把保護邊，都可以自己喜愛嘅顏色作配搭，絕能凸顯自家一份獨特個性。

RallyMarch型到盡　
若然你覺得裝有全車包圍嘅AeroMarch唔係太啱你口味，想再激啲的話，得！無問題！皆因代理方面已特別為你準備咗一款型到盡嘅RallyMarch特別版；部車除咗與AeroMarch版本一樣，裝有多項跑車化裝備之餘，佢重加有IMPUL巨型跑車尾翼、NISMO頭冚及車身貼紙，同埋NISMO字樣嘅車身貼紙，望落可謂辣味十足，簡直同一部落場用嘅March戰車無分別㗎！

■全新RallyMarch雖沿用一台1.2公升直4偈，但其出眾性能表現卻教人留有深刻印象。

■車身兩旁貼有NISMO賽車貼紙，望落份外突出。

■車身兩側裝有裙腳，看來更見跑味十足。

■車頭泵把連整流器組合，吸引度十足。

■大型IMPUL尾翼，跑車化形象徹底地展露出來。

AeroMarch跑意盡現
早前日產代理為March推出一款K12包圍版，其跑車化賣相令人對其留有深刻印象，因而備受車迷追捧；今回代理方面再接再厲，為March披上戰衣，當中包括車頭整流器、霧燈、車身兩側裙腳、門邊電鏡連指揮燈及車尾定翼等配搭，並將之定名為AeroMarch，實行再戰江湖。相信以其一身跑車化裝扮，定會再一次成為車迷嘅追捧目標呢！

■加有一身跑車包圍嘅AeroMarch，一份跑車韻味油然而生。

■車身兩側裝有裙腳，可予人更靠貼地面之感。

■門邊鏡加裝指揮燈配搭，實用性甚高。

■全新AeroMarch特別版，車尾裝有定翼連高置煞車燈，既美觀又能收穩壓之效。

MarchCup加貼紙型得多
若然你覺得為部車加裝跑車包圍會比較「大工程」，但又想座駕能於車群中突圍而出的話，咁就不妨考慮呢款MarchCup版本噃！只需花千多元，便可為車子四周貼上MarchCup及Nissan字樣嘅貼紙，望落去部車都型啲。

■加有全車MarchCup貼紙嘅日產March，雖然來得簡單一點，但仍難掩一份誘人魅力。

記者評語：特別版更吸引
日產March本身頗Cute嘅賣相，響加入呢四款不同包裝之後，頓時變得更具吸引力；而實用車廂配搭，同埋輸出平均有力嘅1.2公升直4偈，亦都功不可沒㗎！

1.2公升偈表現出眾
雖然呢四部特別版March各有特色，但其車廂配搭都與標準版本相同，不但空間闊落令乘客可享有一個舒適嘅乘車環境外，設備配搭亦見齊全易用；而引擎則沿用一台1.2公升直4DOHC偈，輸出較一眾同級車來得更強更勁，而且重有運轉寧靜及低耗油量嘅特性，匹配埋一套4前速自動波箱，行車表現更見順滑流暢呢！

■座艙布局簡潔之餘，空間亦見寬敞闊落。

日產March小檔案
引擎：1240cc直4DOHC
馬力：90ps/5600rpm
扭力：12.3kgm/4000rpm
尺碼：3695×1660×1525mm
軸距：2430mm；車重：920kg
新車售價：$109,800（標準版）
車輛提供：合誠汽車（28035333）

■前後兩排座椅擁有頗高承托力，乘坐舒適度高。

■中控台上除備有原廠冷氣外，當然唔少得重有高級音響組合，而且用落重好方便。

■一套4前速自動波轉檔靈敏暢順，得以讓引擎發揮至極。