上個星期陳慧琳（Kelly）同梁朝偉、陳冠希、劉德華，專登去東京宣傳《無間道》，Kelly素來都算得日本傳媒歡心嘅，今次竟然俾日本報紙勁踩，而一班靚仔就俾人讚有魅力，真係同人唔同命咯！
日本報紙《日刊Gendai》話，嗰日喺記招Kelly戴住對綠色手套，啲顏色簡直同日本一隻好出名嘅公仔怪獸KACHAPIN一模一樣，唔知係咪想引在場嘅人發笑喎！其實馮仁昭知道，當日都有人問Kelly點解戴嗰對手套，Kelly話覺得佢得意所以就戴喎！
份報紙重話，Kelly搵食咁耐，去過日本咁多次，啲日文都重係唔掂，嗰日佢講咗句：「呢套係好好嘅電影！」報道就笑佢發音好騎呢，重話：「唔通你係陳美齡？」都係好似踩人踩得過咗火喎！
不過，報道就讚偉仔同華仔人氣夠，日本記者以男人較多，但嗰日記者竟然有七成係女人，擺明專登嚟睇靚仔，加上記招場地好熱，成個場都充滿女人臭汗味喎！
趙薇同姜文早前拍攝電影《天地英雄》期間傳出佢哋嘅緋聞，趙薇日前重用普通話話：「幸好被傳緋聞的人都是自己崇拜和欣賞的對象，若是跟一個自己不喜歡的人傳緋聞，我一定跳出來抗議咧！」趙薇覺得自己性格同姜文一樣好似長唔大，好容易將情緒表現出嚟。馮仁昭覺得佢哋咁啱Key，所以話緋聞嘅嘢空穴來風，未必無因。
亞視即將會推出一個新節目《粵港越好玩》，而陳啟泰就會擔任主持，呢個節目主要係發掘粵、港澳三個地方一啲好玩嘅嘢。另外呢個節目入面重有一個環節叫做「天生明星相」，咁就會邀請唔同地方似明星嘅人參加，據知好似有珠海成龍、劉德華同埋廣州周星馳，不過唔知個節目會唔會有《百萬富翁》咁好收視呢？
張栢芝日前又去咗長春做表演搵銀，佢同內地記者自爆有咗心上人，栢芝話：「是一個外國人，我們是好朋友，他不懂中文，所以看不懂中文報紙，因為不在同一個地方沒有發展機會，不過我希望我們有機會，說我跟陳冠希發展實在可笑，同時我也不想再提謝霆鋒這三個字。」栢芝突然爆出有個外國男友，佢成日俾記者追蹤，但係又唔見有呢位猛男嘅。
Rosemary同媽咪Julie噚日帶住一班嚟自上海嘅Fans去咗行街買嘢，Rosemary噚日成個旅遊大使咁以普通話同啲fans溝通，Julie話自從個女同Gordon分手之後肯聽佢話專心工作，佢哋兩母女嘅關係即刻有改善，佢重話Rosemary之前錄咗兩隻歌諗住出唱片，不過因為沙士問題暫停咗，Julie真係一個新一代星媽！
