阿虎難得星期日晚可以靜靜地喺屋企睇電視，點知睇到秋官於10月6日將有新劇上畫，真係大吉利是。本來9月期指係好友天下，但噚日期指結算日，恒指居然大跌148點，收報11141，連CEPA都起唔到任何刺激作用，你都咪話阿虎迷信，秋官效應確實厲害。中港官員在簽訂CEPA時，並無為銀行業帶來人民幣業務的好消息，令中銀香港（2388）慘被質低5.2%，收11元，成交逾6.5億元。
雖然樓市繼續轉活，甚至有消息話孫公唔會再出新招救市，兼且明年有可能恢復勾地，以避免將來樓宇供應過份短缺。不過大摩仍繼續唱淡地產股，據講大摩調低新地（016）目標價至38元，即係話新地要較昨日收市價跌38.6%。黑客話，如果中央夠醒目，應該在港府恢復勾地及拍賣地皮之時派中資入市競投，搞㷫氣氛，為香港地產製造一片昇平景象，增加市民置業信心。
港府過往多次出招減少土地供應，但樓市始終未能復甦，主要是投資信心不足，需求遠低於供應，因此加強投資信心，才是對症下藥之策。
鄭州燃氣（8099）上周話華創（291）提出入股意向，不過華創掌門人寧高寧話只係想在鄭州投資燃氣項目，唔係入股鄭州燃氣。件事出現兩個完全不同版本，睇嚟鄭州燃氣有排煩，唔知佢點樣向監管當局及股民交代呢？
時富金融（8122）一路升一路傳聞滿天飛，包括賣殼等。噚日隻股失驚無神停牌話要供股，今次真係令捧場客失晒預算。
阿 虎