就咁話玩具開倉，你可能唔係太感興趣，但如果話你知今次全部都係日本人氣玩具好似HelloKitty、超合金模型等等，而且重係低至一折起，你嘅興趣係咪即刻返晒嚟？無錯，今次呢個玩具開倉可謂大人細路都啱，除有小朋友至愛嘅卡通人物之外，重有至筍嘅PG版高達模型，低於半價發售，畀幾百蚊就可以帶返屋企，一於帶足彈藥掃個痛快！
記者：黃婉冰 攝影：楊錦文
ImageBoy&Girl：Macy&Jack
PG版Z高達模型
原價$1,559 開倉價$600
被高達迷視為極品嘅PG版Z高達模型，今勻居然罕有地由千幾蚊減到六百，呢款一向價錢高企又量少，今次開倉大割價，屬必掃之選，但數量有限，只得幾盒，如果想執筍貨就要有咁早得咁早，始終筍嘢多人爭嘛！
原價$938 開倉價$360
另一至筍推介就係呢個PG版量產型渣古，PG版極少有減價，以前唔捨得買，終於等到頸都長，減到半價唔使就可以擁有，重等咩？數量有限，手快有，手慢無。
原價$119 開倉價$30
反正都買開，咁唔爭在畀多三十蚊買埋呢個1：144HGUC版勇士模型，呢款可能未必係你嘅至愛，但$119減到$30，唔買會唔會有啲對唔住自己呢？
原價$169 開倉價$120
MG版向來較多人買，因為佢價錢比PG版平，好多人唔捨得買PG版都會退而求其次買MG版，今次連MG版都跌價，追捧開嘅當然不可不掃，呢款自護號雖然平得唔多，但始終比市面平，無呢個款不妨諗諗！
小魔女DoReMe迷你公仔
原價$69.9 開倉價$10
估唔到今期勁Hit嘅小魔女DoReMe都大平賣，要數最抵掃，非呢幾款迷你公仔莫屬，每個公仔都附送一把迷你掃把同腳架一個，家陣減到$10個，儲齊成套六個都係六十蚊，迷姐們都係時候入貨喇。
原價$99.9 開倉價$50
唔鍾意齋睇，鍾意有得玩吓，咁就要揀呢款會變身嘅小魔女，你可以幫佢改頭換面換埋衫都重得，比迷你公仔多啲嘢玩吓，市面重熱賣緊，現半價有交易，忍得手就奇！
原價$179 開倉價$80
HelloKitty各種貨色中，以大大份玩得又用得嘅款式最值得掃，好似呢款堡壘造型嘅刨冰機，真係可以用嚟整刨冰，內附冰刨、膠杯同糖漿杯，冬天重未到，買番個返屋企都未算遲！
原價$299 開倉價$100
平時一個毛公仔閒閒哋都要百幾二百蚊，但係呢個得意手推車連HelloKitty毛公仔都係$100，推動三輪車時，車頭兩個公仔頭重會上下咁郁，又幾盞鬼，小朋友見到一定愛不釋手。
原價$169 開倉價$80
呢座堡壘名副其實真係會發光，熄晒燈，按一下旁邊個掣，成個堡壘就會着燈發光，買畀小朋友，等佢哋同埋HelloKitty一齊夜探古堡。
原價$299 開倉價$100
唔少大細路到𠵱家都重鍾情於幪面超人，如果你係其中之一，咁呢款幪面超人遙控電單車可能會合你心水，操控好簡單，可以向左走、向右走，向前走都得，將電單車可安在遙控器上充電，買嚟儲都抵。
原價$299 開倉價$200
真正遙控飛機唔係人人玩得起，純粹想過癮一下，咁不如CheapCheap哋買呢架遙控花式滑翔機，成架用發泡膠製成，簡單易砌，操控非常容易，可以飛到上30呎高空。
原價$89.8 開倉價$20
有超人又點可以無戰機？各款超人戰機減到$20，呢隻金色機身嘅地球保衞隊指揮機，駕駛艙可以分開，咁平，不妨買多幾隻唔同款式，重可以分體變成另一款強化版戰機！
原價$79.9 開倉價$20
雖然數碼暴龍無以前咁Hit，但係以$20作招徠，唔多唔少都有啲號召力，而且款式都算多，可以趁低吸納補買未有嗰幾款，咁就可以儲齊成套！
街坊必掃高達模型
日本玩具開倉
地點：青衣長達路14-20號偉力工業A座7字樓
日期：9月30、10月2及3日中午12時至晚上8時，10月1、4及5日上午11時至下午6時。
查詢電話：21498652
付款方法：現金、EPS及信用卡，惠顧滿$100可使用EPS，滿$200方可使用VISA或Master卡。
交通：10月1、4及5日可於葵芳地鐵站D出口乘搭免費穿梭巴士。
可於油尖旺區彌敦道乘41A、葵芳地鐵站乘88及88B綠色小巴，於青衣警署落車、於城門隧道轉車處轉乘49X、青衣地鐵站乘249M、荃灣大河道乘243M，於翠怡花園落車。
備註：12歲以下小朋友入場可獲贈精美貼紙乙盒。
