唔知雲邦荷斯係咪新嚟唔知規矩，前晚巴塞隆拿作客對馬體會場西甲聯賽事，臨完場前竟然搶咗沙維個罰球嚟射！係人都知沙維一向射罰球幾有把握，亦係隊中比較出色嘅，難怪佢即刻走去鬧鬼雲邦荷斯！
講開呢場波，唔少上盤客都同我求大俠講話好彩，事關要讓平/半嘅巴塞，上半場就有列斯加侵犯對方單刀避過紅牌、及馬體會有個入球被球證「誤判」詐胡；下半場又有高古及莫達被罰出場，一直俾馬體會㩒住嚟砌，最後都可以打和，真係輸半個盤都願！就正如佢哋領隊列卡特賽後話齋：「我對這個戰果已經好滿意。」
愛爾蘭翼鋒杜夫加盟車路士之後，人工同身價都三級跳，𠵱家每年人工都有成三百五十萬鎊（約四千五百萬港元）。不過佢並無因為成為富豪之後而變質噃，據我求大俠所知，佢𠵱家重係將所有錢交晒畀阿媽保管㗎！咁孝順固然抵讚，大家都應該以佢為榜樣呀！
列斯季初成績，自從喺AC米蘭搵咗巴西後衞洛基祖利亞之後，真係未好過，上陣三次，球隊就一共失咗十球，搞到列斯領隊列特賽後都無奈話，好擔心球隊今後成績同自己嗰位。不過，我求大俠知道洛基祖利亞今個星期六主場對布力般會停賽，睇吓到時會唔會轉運？
有睇AC米蘭前日對萊切嘅波迷，應該無錯過李華度賽前同班隊友逐一擁抱話別嘅場面。點知AC副會長加里安尼賽後突然話挽留李華度，而官方更喺周一宣布佢願意留低，即刻隨隊出鬥切爾達，認真兒戲。相信AC一定應承重用佢，是好是壞實屬未知之數。
英格蘭桌球手奧蘇利雲，一直係我求大俠欣賞嘅球星。因為佢打波夠爽快，觀賞性高。不過，佢場外嘅神化嘢就不敢恭維，佢曾直認想過自殺，又食過鎮靜劑、大麻之類嘅嘢。之但係，本來係天主教徒嘅佢，無端端喺上個月入咗回教。重有幾日，新球季就開鑼，願真神保佑佢！