林家聲的三十七歲次子潤添昨日在家燒炭自殺身亡，聲哥好友李香琴、周潤發和薛家燕深表哀痛，發哥更擔心聲哥的身體狀況及望他節哀順變。
本月九日與太太紅荳子在加拿大多倫多慶祝結婚四十一周年紀念的粵劇名伶林家聲，其次子潤添昨日在窩打老道的寓所燒炭自殺身亡，此噩耗震驚粵劇界和演藝界，與林家聲交情深厚的李香琴、周潤發和薛家燕昨日驚聞潤添死訊十分痛心。
三年多前，聲哥因替藝進同學會籌募興建青年坊的經費，而與發哥來往密切，昨日發哥在電話中說：「記憶中我好似未見過佢個細仔潤添，近年嚟聲哥身體唔係咁好，長期喺加拿大住，我同聲哥都好少碰面，不過兩年幾前聲哥幫藝進同學會籌款，我哋有碰過面，我一向好欣賞聲哥長期以嚟咁熱心公益事務。」
七十歲的聲哥要白頭人送黑頭人，必然傷心欲絕。發哥對前輩健康深表關心，他說：「希望聲哥可以節哀順變，呢個時候真係唔知可以再同佢講乜嘢。」
李香琴與林家聲合作多部粵語片，相交幾十年，她接受電話訪問說：「聽到呢個消息後，我唔敢打畀聲哥，驚影響佢身體。」
以前曾與林潤添有數面之緣的琴姐，稱讚潤添為人聰明兼孝順。她說：「潤添一向做事要求高，可能因為咁畀自己好大壓力，據我所知佢離開港台之後，好似開咗間電腦公司。剛才我打過畀聲哥妹妹家儀，佢喊得好厲害。」
而薛家燕對於前輩喪子，她惋惜地說：「我見過聲哥啲仔，咁後生梗係可惜，何必犧牲自己呢！我會打電話畀聲哥，𠵱家啲風氣真係唔好，我知道尋死要好大勇氣，睇返轉頭其實冇乜嘢難到自己。」
