估唔到講英國電視牌照費，會引來咁多讀者電郵。除咗博士Ｙ之外，重有幾位前英國公民，留英學生，以至德國居民寫嚟。
一位德國讀者Ling話：「我以前住喺英國，現居於德國，無論英德，我哋都要交電視牌照費，我認為兩地人民非常老實，百分之九十九都會繳交，唔會因此而呃政府。交電視牌照費嘅好處就係我哋可以睇電視而唔使睇廣告，睇厭咗ＣＮＮ嘅吹牛，可以立即轉台，聽番另類意見。呢度人人都交牌照費，邊度會招惹到當局派人上門查視咁低莊。你有冇留意到，香港地鐵要入閘，柏林嘅U-Bahn（地鐵）係冇閘嘅，乘客自出自入，車內有人查票，但我從來冇見過有人搭霸王車！」
讀者Ｃ居於德國，仍然上網閱讀《蘋果》，可見《蘋果》網上版無遠弗屆，互聯網係二十世紀嘅最偉大發明，將地球人嘅傳訊空間壓縮晒，讓「天涯若毗鄰」成為真實。左丁山曾經讀過兩年德文，不過已經交番晒畀先生，忘記了百分之九十九點九九，自己嘅大學老師幾乎全部留學德國，所以聽德國人老實嘅故事，聽過唔少，非常佩服。因為民情不同，外國做法唔可以搬過嚟香港。譬如美國城市賣報紙，用自助玻璃箱，我哋放五毫子落去，就可以揭開玻璃蓋，攞一份報紙出嚟。假如香港係咁，分分鐘玻璃箱內嘅報紙會俾一個人攞晒！如果香港要收電視牌照費囉喎，警察肯定疲於奔命啦。