病態賭博總在不知不覺間令人墮入欠債絕境，更令不少原本幸福的家庭關係破裂。四十歲的阿鳳，年前毅然離開嗜賭丈夫，帶着一對年幼子女過着居無定所的生活，沒有絲毫安全感。近日，單親三口喜獲房屋署編配公屋，可是阿鳳開心了不過兩天，便為一筆為數不少的搬遷費用弄得夜夜失眠；蘋果日報慈善基金瞬即撥款援助。
帶着子女過了五年飄泊日子的阿鳳，深深知道一個穩定居所對於子女成長有多重要，她希望子女重拾一份「家」的感覺。「呢幾年都搬咗三次屋，搬一次就煩一次。我今次申請公屋都係為長久之計，希望仔女有個安定啲嘅屋企，租住私人樓始終冇一個穩定性，又唔知業主會唔會失驚無神話加租。」阿鳳說。
阿鳳與任職運輸的前夫十多年前結婚，育有一對現年分別十四歲及七歲子女。阿鳳婚後仍任職售貨員分擔生計，其後懷有孻女時碰巧失業，她便索性專心在家相夫教子。阿鳳表示，前夫於結婚初期並不嗜賭，後來家庭經濟壓力漸增，前夫曾對她說過：「屋企唔夠錢使，我去搵多啲錢返嚟。」阿鳳卻沒想到前夫竟會以賭博這等不勞而獲的方法去嘗試「賺錢」，最終不但債台高築，欠下超過二十萬元債務，更賠上了家庭幸福。
阿鳳於九八年與前夫離婚，現時租住港島區一個私人單位。日前，她獲房屋署通知，獲分配一個位於將軍澳的公屋單位，位置鄰近地鐵站，交通十分方便。
「其實之前房屋署已經配過兩次屋畀我，我都冇要到，今次係最後機會，如果再唔要，就要重新排過隊。不過我只係開心咗兩日，就要為筆搬遷費煩，呢幾日都瞓唔到，太多嘢諗。」阿鳳幽幽地說。
阿鳳粗略估計，今次搬屋所需使費，連同單位按金、水電煤氣按金、搬運費及基本裝修，動輒一萬元。她慨歎，自今年六月社署削減綜援金後，三口每月少了一千多元津貼，生活質素已經大受影響，每月單是租金便要倒貼多達九百元，根本無力負擔如此龐大的額外開支。
「重有因為細女已經開咗學，要下個學期先轉到校，所以搬咗屋之後，我每日都要帶佢由將軍澳搭車去港島區返學，嚟緊交通費支出會多咗好多。」阿鳳坦言今後數月都要勒緊肚皮度日。
蘋果日報慈善基金即時撥款八千元予阿鳳，助她應付搬往公屋的開支。
捐款編號：C1126
暖流熱線
電話：29908688
傳真：23702192
電郵：
網址：