型事偵緝：Bape×adidas第2彈<br>「超級猿人」板鞋全港率先睇

型事偵緝：Bape×adidas第2彈
「超級猿人」板鞋全港率先睇

一招Bape×adidasCrossover攻勢，完全打破了近年「猿人」波鞋炒唔起的悶局。潮友只要睇吓兩個禮拜前的一對「超級猿人星」（SuperApeStar），直至今日依然企硬$3,499呢個高位就知一二。小弟心諗：Bape×adidas呢條方程式應該陸續有嚟！話口未完，Bape×adidas即有第2彈爆出，乘着「超級猿人星」之勢推出限量500對的「超級猿人」板鞋（SuperApeSkate），首日掛牌報$3,000，平過「超級猿人星」！

記者：陳嘉文
攝影：林栢鈞

超級夢幻組合
Bape×adidas
「猿人」主腦Nigo愛死adidas早有前科，品牌早期成名作SkullShoes就是擺明車馬抄adidas對經典Superstar──將Superstar招牌西瓜頭設計變種為猿人眼，可見Nigo有幾愛adidas！2003年8月，Bape與adidas終於達成協議聯手推出合作版波鞋。頭炮作Bape×adidas「超級猿人星」於青山、原宿BusyWorkShop及代官山的FootSoldier率先售賣，售價約$1,600。如此潮流界盛事當然惹來排隊搶購潮，結果不消一小時已全數沽清，且即日已有海鮮價報$3,000！是否食水深是後話，潮友心態最簡單──限量夠矜貴外（人冇我有至夠巴閉！），最重要還是甚具話題性的潮鞋在我腳。

■大大塊「三間猿人」牌後，寫明SuperApeSkate交叉合作。

第2彈火速現身
「超級猿人」板鞋
難得兩大經典搞合作，當然噱頭作陸續有嚟！Bape×adidas的第2彈，命名為「超級猿人」板鞋，Hi-cut設計，率先曝光為黑×白版本，打蛇隨棍上還有蛇皮及綠×白兩版本。不過今勻的獨家售賣地移師至美國紐約Soho區的adidasConceptShop、三藩市的HUF及LA潮流舖Undefeated；開盤價為$300美金（約$2,340港元）。近日此勁鞋已活躍於eBay炒賣市場，黑×白版本的最新成交價為$400美金（約$3,120港元）。市場有炒價正好道出：超級夢幻組合炒得起是理所當然。

■收得你幾千銀一對波鞋，靚靚副產品自然唔少得。老細！畀夠三對鞋帶你又點話呀！

■鞋踭位印明限量發售500對。

■Grand得緊要是「三間猿人」金章！

潮流友點睇「超級猿人」板鞋？
27歲的Michael做櫥窗設計，自言是百分百Nike擁躉，對adi一向癮頭唔大。然而面對着第2彈的「超級猿人」板鞋，Michael話真係有啲心郁！「老實講，雖然係兩名牌首次合作，但頭炮的SuperApeStar並唔吸引我，主要係我唔BuySuperstar。不過今次無論款式到手工都比前作好，如作價Under$3,000，我會Take！」

一周熱爆話題

買潮鞋？落上海街！
今日的「超級猿人」板鞋能夠火速曝光，要多得Kevin。閣下腳上踏着的矜貴Crossover波鞋，分分鐘係佢老兄一手引入！名副其實水貨波鞋天王的Kevin，從前工作就是替各大水貨舖尋珍品。直至近期，Kevin正正式式打開門口做水貨波鞋生意，而盤據地竟然在連一間波鞋舖都冇的上海街，但夠薑在此插旗當有其法門。就連各大土炮潮流雜誌，近期最勁最潮的波鞋介紹，其售賣點均是在上海街。