上周六，趙飛雲同老友入馬場，跑至第4場有隻新馬叫「大好友」，老友話呢排做好友，在股市斬獲不菲，打算買番啲捧吓場，重問趙飛雲有冇其他心水畀佢買三重彩。趙飛雲睇吓隻「大好友」獨贏賠率99倍，臨場隻馬未收身，當然唔會買，但就彈咗兩隻心水馬「超理想」及「美好見證」畀老友，結果老友就獨贏、連贏、三重彩全中，趙飛雲就因為冇咗隻「大好友」而WQT全撻。
散場後，老友請食鮑魚，但趙飛雲食不知味由背脊落，估唔到炒股唔做好友冇錢贏，連跑馬唔買「大好友」都要受懲罰！
雖然受咗咁大刺激，但趙飛雲對港股期指結算後走勢仍睇淡，暫時唔會做好友，只會伺機炒一兩轉恒指Put輪。
上周五美股仍以下跌收場，杜指跌30點，收9313，納指跌1.4%，收1792。美股上周轉弱迹象漸明顯，杜指跌穿50日線後，正向8月底部9000進發，納指亦迅速向下考驗50日線支持1775，若失守，將向8月底部1650水平推進。
若美股向8月底部尋底，港股獨強的局面相信難以維持，恒指50日線在10587，8月底部在10000水平，恒指短期若跟隨美股調整，50日線10587是最起碼調整水平，守穩可當作完成2浪調整，再展3浪升勢。
短期入市部署，恒指若升破11300，候上試上次高位11444不破，買入恒指Put輪9063，首個目標11100，向下破位可加注，第2個目標10600，止蝕位則以恒指升破6月頂部11475，在11500前進行。
趙飛雲