九月份新盤相當好賣，今個月又多一個盤沽清，噚日見到九建羅汝榮輕輕鬆鬆，參觀行家嘅深灣軒示範單位，佢同蘭西講，九建西半山采文軒，已全數沽清，時間只不過係用咗大概三個半月。
不過佢補充話，個盤銷情飆升，都係呢個月嘅事，淨係過去一個禮拜，已經賣咗十間，成個9月就賣咗四十幾間，而采文軒只係得一百零四伙，即係話單單今個月就賣咗差唔多一半，真係唔講得笑。
近排都有唔少投資者入市，羅汝榮就話，采文軒嘅買家，有四成係收租客，成個盤賣晒，套現超過二億，平均呎價去到三千四百蚊。
至於點解禮拜日都要出動，去深灣軒取經，羅汝榮就話，九建喺堅尼地城嘅新盤采逸軒，打算下月中開賣，價錢會參考深灣軒，所以嚟睇吓咁話，而采逸軒嘅意向呎價就去到四千蚊。
近排好多人都問，地產個勢究竟係真旺定虛火？各界都有唔同意見，一時間都好難下定論。不過，同地產有關嘅行業，例如代理行業就真係生猛咗好多，除咗記者會日日搞之外，擴充業務之聲不絕，好似中原早兩日搞嘅招聘會，就吸引三百人前往，超過八成申請做代理，其餘就應徵文職，聽講即場請咗最少五十人。
美聯方面，就將焦點放落工商舖部門，準備全面擴充，迎接自由行同CEPA帶嚟嘅商機，短期內將會增聘兩成人手，舖位組就會搬去旺角雅蘭，寫字樓樓面增加一倍。
早兩日中原中國足球隊，約戰由各報地產版記者組成嘅雜牌軍，喺沙田踢咗場友誼賽，結果係二比二賽和。本來以為上個禮拜天氣開始轉涼，會踢得輕鬆啲，點知落場當日不知幾咁風和日麗，太陽比平時更光更熱，啲風就輕輕的來，連素有訓練嘅中原中國足球隊，都大歎吃不消，更何況對住電腦多過足球嘅記者！所以，能夠打成平手，大家都非常滿足。
名模周汶錡噚日參觀深灣軒示範單位時透露，早喺一年前已有置業大計，諗住買番個細單位自住。周小姐對物業有個特別要求，話由於風水命理嘅關係，所以想買海景樓，不過又覺得望住維多利亞港無乜特別，反而鍾意深灣軒可以望到海之餘，重可以望到海洋公園，似乎情有獨鍾。
周小姐重話，預算係二百幾萬，重好謙咁話怕太貴負擔唔起。睇完示範單位之後，覺得個間隔都唔錯，重即場向新地工作人員問價。工夫做到足，不過聽經紀講，佢最後都無入市。
今個月一二手住宅買賣都好活躍，發展商同二手業主齊齊加價，買家又肯追價，代理行梗係賺大錢啦，不過佢哋似乎面有憂色，唔通嫌賺得少？
蘭西聽番業界講，由於有啲業主十分睇好後市，索性封盤，搞到就算有買家肯追價都成唔到，市場少咗好多放盤，出現缺盤嘅情況。
另一方面，買家見樓價升咗約一成，開始有啲猶豫，入市速度自然減慢，形成拉鋸局面。業界因此擔心10月成交量會大幅減少，咁佣金收入咪唔見一截囉。
蘭西
電郵地址：
