701收料站:新確或有櫥窗粉飾

701收料站:新確或有櫥窗粉飾

早排受到追捧嘅工業股,唔少在股價大幅上揚後,出現疲態,部份更因芬佬減磅而大幅回吐。不過,臨近季結,有芬佬仍然坐住貨嘅工業股,相信表現唔會太差,部份更可能出現短暫升勢。
新確科技(1063)5月在0.37元水平起步,公司於8月曾先舊後新,以每股0.96元批過一次股,雖然集資額唔夠2500萬元,但當時有唔少芬佬要貨,批完股後,股價以橫行為主。
上周新確公布中期業績,盈利增加83%至1800萬元,但股價下跌,上周五收1.06元,跌1.83%。不過臨近季結,新確有芬佬坐貨,估計會有櫥窗粉飾行動,表現唔會太差。
另外,經紀黃叫小初留意東強電子(615),佢話公司想集資好耐,雖然早排搞咗個銀團貸款,但因為負債比率唔低,如果可以批股集資,始終會好啲。
東強早前公布截至今年6月底半年業績,股東應佔溢利3100萬元,比去年同期勁升53%,表現算靚仔。不過,如果要批股最好趁早,否則遲啲怕芬佬食滯。
慕容小初