富豪上京，果然沙塵滾滾，場面盛大過《帝國驕雄》，不過論娛樂性就不及上一次大西北嗰鑊，因為今次唔係國家歧視婦女，定係大頭蝦，竟然冇咗被英國傳媒選為有錢過英女皇嘅亞洲名雌首富小甜甜龔如心。記得佢上次上大西北，精神狀態勁high，又奇裝異服又大跳民族舞，又話會斥資億元投資金鑛，記者不愁冇題材；雖然今次有超人李嘉誠，但超人講嘢正氣爆棚，喺呢個反智社會，八方寧願睇小甜甜同煲呔曾做大騷。至於點解呢位亞洲富婆冇北上，口痕友話同單爭產官司有關係，國家好尊重香港法治，都係等法官判完先至好決定重識佢唔識。
另一位冇上京嘅富豪係六叔邵逸夫，邵蛇點解又唔去？當然唔係因為官司，相信係佢年事已高，無謂舟車勞頓，加上又唔需要提攜後進，咪費事飛。不過，佢唔入團，卻博得胡錦濤主席一開口就探問佢點解唔嚟，可見邵蛇人唔到威勢遠達中南海，好以金庸套《碧血劍》裏面嗰個金蛇郎君，一直冇出過場，聲威貫穿全書，呢啲先至係萬世巨星級嘅超豪大亨呀。
傳真︰2623-9278
電郵︰