現代人飲食講求健康，尤其女性更加注重，要佢食多啖都難。好似Annie和Chris這對情侶，正是當中的表表者。兩人都貪靚怕肥，出街食飯怕油多營養少，索性自己煮，用鮮果做配料，食得健康又可Keepfit。而且兩人性格各有不同，一個衝動一個淡定，做事反而更合拍。自煮不但可以健康啲，更可以當拍拖節目，一舉兩得。
記者：羅惠芬
攝影：陳陶鈞
場地提供：Seeyouthen
在澳洲讀書時認識的Annie和Chris，拍拖可說是由食開始。二人都是愛吃之人，每逢提起食，話匣子總是講不完，順理成章拍埋拖。每逢生日過節，兩口子都愛自己下廚整幾味，Chris更經常煲愛心靚湯𠱁女朋友，煮和吃可說是兩人的拍拖必備節目。
不過，返香港工作後，大家都忙，要親自下廚的機會已經少之有少。直至Annie的體重開始有上升趨勢，Chris才發覺，只有自己煮食才可控制熱量。基於大家都愛靚，Chris開始親自炮製些健康食品畀女友，重專攻生果，貪佢脂肪少水份多，食幾多都唔怕肥，Keep fit最啱。最重要係：「用生果做材料，顏色夠Sharp夠靚，Annie一定肯食！」
$17/1人份量
Chris最撚手的不是煮，而是花巧工夫，最叻替食物做裝飾。皆因他深信「女孩子都貪靚」，美麗的外觀絕對能增加食慾。今次的花之戀番茄夾，取材自經常在日式食肆見到的花之卷壽司，以新鮮生果取代米飯就唔怕肥，Annie自然能放膽食啦！
大番茄1個
三文魚片3-4片
蘋果肉適量
奇異果適量
士多啤梨適量
沙律醬2茶匙
香草適量
$26/2人份量
眼見男友煮亦興高采烈，Annie也不甘示弱，煮健康菜畀男友Keepfit，主力炮製鮮果配米飯的食品，因為夠醒胃之餘亦夠飽肚。Annie話：「最難係調配個醬汁，好多朋友都試過整，不過阿Chris話唔滿意。」當然啦，女朋友整一定要係最好味。
蕎麥麵線150克
火腿1塊切片
菠蘿、奇異果、士多啤梨肉各適量
香草適量
花生醬2湯匙
糖11/2湯匙
沙律醬2湯匙
豉油1/2湯匙
暖水3湯匙
小貼士
1.麵線煮熟後要用凍開水過冷河，目的是令麵身更爽滑。
2.冰鎮後，要用紙將麵身的水份吸乾，食時才會有彈牙的口感。
