《大隻佬》首日開畫收二百九十萬，破了今年首日開畫票房紀錄，主角劉德華、張栢芝十分高興，而導演杜琪峯則透露一早和中國星老闆講明套戲不是笑片，好踩線，如今反應好，他才定下心來。
由劉德華、張栢芝主演的電影《大隻佬》前天首日上畫，六十間戲院上映，首日票房連午夜場票房二百九十萬，可謂十分驚人，破了今年首日開畫的票房紀錄，華仔和栢芝以及導演杜琪峯聽到這個消息後都非常興奮。
張栢芝昨日身在內地，她在電話中說：「拍呢套戲嘅時候天氣好熱好辛苦，尤其係華哥，要着住幾十磅嘅衫，我真係好佩服佢嘅勤力同刻苦，遲啲套戲喺內地上，希望國內有更加好嘅成績啦。」
導演杜琪峯昨日接受訪問時亦說：「呢個數目比我預期中高，我冇諗過有咁高票房，因為呢套係劇情片，唔係笑片。如果拍喜劇，票房一定會多啲，但我同韋家輝商量過，想用另一個形式拍。當初我同向生（中國星老闆向華強）講，唔想拍套跟風片，呢套戲好踩線，向生批准咗，𠵱家反應咁好，我自己個心都定咗。雖然套戲同《無間道II》差唔多同期上，但我冇擔心票房，因為有兩部戲同時好收係好事，咁就證明成個巿旺。」
劉德華昨日說：「好開心呀！電影裡面帶一個咁深道理，觀眾都可以接受，證明香港觀眾係有深度，除咗娛樂性題材外，可以廣泛接納好多唔同類型電影。最好票房日日都係收三百萬就好啦！」
此外，張栢芝早前和母親、弟弟張豪龍一齊去日本玩，栢芝說今次日本之行，主要是想過去買嘢和食嘢。對於有報道指栢芝行春藥店，栢芝說：「我唔嬲，重覺得好好笑，報道清楚寫明我只係行過，但咁都要攞嚟做封面，如果本雜誌靠我賣到書，咁真係要分番啲花紅畀我。」