洪天明一向口花花，噚日佢喺旺角大球場參加足球慈善比賽，見到青春女子組合2R喺現場擔任嘉賓，天明即刻公然喺台上撩女仔，一味話要同2R合照，但最終都影唔成，個勢好似對2R十分迷戀，下次輪到Cookies擔任嘉賓唔知天明又會唔會合照呢？估唔到天明話：「佢哋太細個，我鍾意子淇（徐子淇）姐姐。」
早前先有傳聞話天明同子淇復合，而吳嘉龍又話鍾意子淇，今次兩人擺明係要拗手瓜，子淇真係有福，竟然有兩位猛男齊齊向佢公開示愛，唔知返咗英國讀書嘅子淇會揀邊個呢？不過天明一時一樣，呢頭話鍾意子淇，嗰頭又否認同子淇拍拖，天明話：「我哋都係朋友啫。」咁即係話，吳嘉龍重有機會咯。
江華（中）話無綫十月十二號啟城儀式嗰日，可能唔得閒去。佢大條道理話：「因為我應承人上大陸做騷在先，無綫亮燈係重要，但做人係要講口齒。」不過早前連薛家燕都話即刻推咗個講座，乜江華真係唔怕得罪無綫，佢話：「唔怕，做嘢係講理由，我從來唔怕得罪人。」
向海嵐同譚耀文噚日喺奧海城宣傳劇集《俗世情真》，佢吔喺劇中係一對情侶，但係感覺完全唔似，連向海嵐都話：「就算戲裏面一場拖手親吻戲都係我哋建議加嘅。」真係話畀人聽拍拖都冇人信啦，而阿譚喺將軍澳電視廣播城啟城儀式榜上有名做嘉賓，阿譚話：「到時死都要死返嚟。」真係畀足面無綫。
陳寶珠昨日為「2003恒生香港盃乒乓球全體錦標賽」做主禮同頒獎嘉賓。現場所見嘅寶珠姐明顯清減咗，佢笑住話：「因為近期忙於籌備個人演唱會，心情重緊張過早前做舞台劇，所以瘦咗少少。」寶珠姐話相對舞台劇，演唱會只有一個人喺台上，要多啲準備做到物有所值。
陳慧嫻（左二）前晚帶病出席勁歌第三季季選，原來慧嫻一直都有耳水唔平衡，佢最近重發現自己開始有發福嘅迹象，所以就不停積極減肥，卒之搞到嗰日暈吓暈吓，但有獎攞佢梗係死撐出席，點知噚日終於頂唔順，喺屋企覺得好辛苦，所以諗住去醫院睇醫生，其實有病就應該早啲睇醫生啦。
