坊間前排出現咗本書《神話背後──李澤楷》，搞到個個以為李超人同小小超不和，之前小小超都已經發炮還擊過，估唔到事隔就快成個月，李超人一提起本書重好好火。
由於《神話背後》有好多珍貴嘅李家圖片，好多人都覺得小小超有參與其中。李超人噚日話，乖仔冇道理要自己害自己，又批評書裏面所謂資料都冇來源，好多相同以前新華社幫佢出嗰本書一樣，亦都有啲相係超人以前送畀朋友嘅。係喎，既然啲相唔係小小超獨家專有，坊間好事者又有乜理由話係小小超畀料呢？
既然真兇係外人，超人又會唔會追究呢？佢冇直接回應，只係重申佢近日嘅口頭襌──唔好反智，又叫傳媒以後嘅水平高啲。
由明窗出版嘅呢本書佢就禁唔到，但為咗叫人唔好睇本書，超人惟有落咒：「你睇晒，一世人你有乜嘢進步？如果我細個時鍾意睇，我冇今日！」睇本書原來可以咁大鑊。
傳真︰2623-9278
電郵︰