港大星期六喺沙田馬場搞咗個「HKUFoundationReunionattheRaces」，為大學籌咗百幾萬，校長徐立之最開心，皆因好多猛料校友出席，馬時亨同葉澍堃都有到，八方見到葉局長，問佢有冇馬出，買邊隻會好分啲？點知局長話，佢都要問人攞貼士，因為佢俾老細捉住開會，冇時間刨馬經。
阿松落咗台咁耐，馬仔嘅心情一路都咁靚，見到啲以前嘅女同學就先行個西式擁抱禮，佢身邊嘅馬太功力深厚，見慣風浪竟然若無其事喎。
問唔到葉局長攞貼士，八方轉而搵徐校長，點知佢話就買第三場七號啦，「勁兔」係大熱，結果跑第三，W唔到，都有錢收。都係張永霖好嘢，畀二場四號，結果跑第一。
校長資深顧問程介明聲稱第一次入馬場，第一次落注，所以袋住張飛好似初次拍拖咁風騷。咁二十幾圍人開party梗係好玩啦，梁家傑話自己專登押後去日本嘅行程嚟參加，畀足面法律學院院長陳文敏。講到鄧小平嘅「馬照跑」遺願，呢一樣就最冇爭議，無論董班子高官同倒董反23嘅法律精英，都一樣捧場。
（圖）港大大學堂全男班玩得特別癲，楊鐵樑頒獎時，大家都拍爛手掌。
傳真︰2623-9278
電郵︰