上個禮拜，屯門發生咗一宗一家四口燒炭自殺及謀殺案，轟動全港，案中一對父母疑因金錢問題，一時睇唔開，帶同兩名年幼子女共赴黃泉，大使睇到呢單新聞，都覺得好心酸。
可能呢幾十年香港嘅經濟真係發展得好蓬勃，香港人歎慣、享受慣，意志變得愈嚟愈薄弱，有乜唔如意就話走去自殺。其實香港老一輩嘅人，有邊個未捱過苦吖，打仗、捱餓、食樹皮都試過啦，個個都係諗住點樣求生，真係估唔到現今一代會為咗啲一時諗唔通嘅事走去尋死，大使老套啲都要講句：「冇咩事係解決唔嚟嘅，唔掂諗到掂！」
大使成日都話，有乜問題諗唔掂嘅話，大可以打開心窗搵人傾訴吓；除咗朋友、屋企人之外，重可以搵專業社工幫手。其實𠵱家好多社會服務機構都有提供情緒輔導熱線，好似香港社會服務聯會嘅「人間互助熱線」1878668，一個電話號碼，就可以幫你接駁到全港一百四十個社會服務機構同政府部門，有專人聆聽你嘅需要，電話亦可以轉駁到蘋果日報慈善基金嘅辦事處。
屯門嗰單燒炭個案，我哋都有即時幫手，喺發生事之後嘅第二日，基金已經將兩萬蚊緊急援助金交到男死者嘅胞姊陳遠歡手中，幫助佢哋殮葬之用。
如閣下正面對經濟困擾，勿再猶豫，打嚟暖流熱線︰29908688，大使會好樂意接聽你嘅電話，並且盡可能提供協助。
暖流熱線
電話：29908688
傳真：23702192
電郵：
網址：
生命熱線
電話：23820000
香港撒瑪利亞防止自殺會
電話：23892222
社會福利署熱線
電話：23432255
香港基督教女青年會輔導熱線
電話：27116622
東華三院東華關懷熱線
電話：25480010
明愛向晴軒熱線
電話：18288