大食Jack早排喺度都提過，好多潮友投訴喺銅鑼灣買日本水貨雜誌要捱貴貨，舉例一本《BOON》喺太子「聯合」賣$30幾，但去到銅鑼灣SOGO後面可以叫價$50幾。無他，因為獨巿生意，有時班潮友只好就範任人魚肉。直至最近，終於有人喺銅鑼灣發起平價賣日本雜誌運動，將所有日潮雜誌以太子「聯合」價賣。原來今次係「宇宙船」率先發起減價，佢哋喺糖街地庫間舖今個月開始，將所有日本水貨雜誌價格調低，舉例最新一期《COOL》，航空版賣$42，等多幾日有船版到，就只賣$35。聽「大隻標」講，𠵱家啲人會先去SOGO後面睇吓有乜新書返，睇啱後殺過去糖街小巴站，車仔麫店隔籬入口，落地庫「宇宙船」買。正如「大隻標」講：「一本平$10，買多幾本已經賺番本《BOON》喇！」睇嚟新一場日本水貨雜誌減價戰隨時喺銅鑼灣爆發。
文：大食Jack