新車速報：<br>豐田Voxy設備多多添方便

新車速報：
豐田Voxy設備多多添方便

近年，豐田旗下多用途MPV大行其道，除咗車迷所熟悉嘅Alphard，以及Previa（即東瀛本土版Estima）外，舊有一款Townace亦曾響香港熱賣咗好一段日子呢！而新一代Townace未有再引入本港市場，惟東瀛本土卻分有Noah同Voxy兩款；最近有車行引入後者嘅Facelifted新版，外形討好前衞之餘，三排八座位組合同樣見實用又設備多多，倒真會係一款不錯嘅MPV選擇㗎！

記者、攝影：李勤
逢星期一至日出版

■尾排除可左右收摺起，令尾廂容量倍增外，地台下另備有儲物箱。

Facelifted新版外形更出眾
呢部走方匣子造型嘅豐田Voxy，可會係同廠Noah嘅變種，不但變得更具個性，兼且重帶有點北美風格，除教人突出有新鮮感外，Facelifted新版更改換上大型車頭氣霸及車尾整流設計，還有直立式高透光尾燈編排，匹配響多邊立體頭燈裝置，睇落又真係幾有瞄頭㗎！



車廂坐足八人仍見寬敞
呢部以方匣子造型示人嘅中型家庭式MPV，唔單止有雙趟門連左邊電動配搭，三排八座位空間夠寬敞之餘，而且重可以相互組合成唔同尺碼嘅卧鋪，又或者將尾排左右收摺起，令尾廂容量有幾近倍增㗎！再者，設備還包括雙天窗、獨立前後恒溫冷氣，又有照明系統連雙安全氣袋組合，裝備可稱得上係一應俱全㖭！

■表板陳設以簡約為主，重有左右同前後Walk-through嘅特色，而三幅式真皮跑車軚環，亦屬新配搭。

■全新尾泵把連整流設計，兩旁重有反光警示貼。

■高置尾定翼連High-mount煞車燈，倍添一份活力感。



電子避震令行車平穩
呢部新款Voxy，除擁有全新低重心車架結構外，一台2.0公升直4DOHC偈，重內附VVT-i設計，令輸出平均又見好力，而新車重加有原廠電子避震，既有Comfort嘅舒適性，又見有Sport嘅剛強一面，有助高速馳騁下行車嘅平穩度；再者，四輪制動反應收放自如，加埋ABS連EBD裝置，還予人無後顧之憂呢！

■全新直立式尾燈組合，有高透光度及易看嘅特色。

■中間雙趟門編排，左邊重係電動設計，上落倍感輕鬆。

■渾然一體嘅中控台，除預留有音響座外，另外重有原廠恒溫冷氣、杯座同雜物配搭。

■三排八座位以雙色絲絨配搭，除軟滑貼服之餘，重有獨立頭枕同三點式安全帶裝置。

■中排之間嘅座席可收摺成桌几，另備有杯座配搭。

■前後三排可相互組合成卧鋪，好啱郊遊戶外用。

■車頂雙天窗配搭，重有獨立房燈同送風口，設備可謂周全講究。

■中置白底三個圓表組合，既簡潔易看之餘，重有詳盡警示燈編排。

記者試後評語：實用度夠高
原有豐田Townace第2代變種車款，造型前衞帶點北美車風格，並擁有雙趟門及八座位配搭，既實用之餘車廂陳設亦見講究，加上全新低重心車架構造，同級車之中走彎能力可謂既突出又穩定。

豐田Voxy規格
引擎：1998cc直4DOHC
馬力：152ps/6000rpm
扭力：20.4kgm/4000rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：195/65R15ToyoJ31
尺碼：4625×1695×1850mm
軸距：2825mm；車重：1480kg
平均耗油：14.2km/L
新車售價：$249,000起（標準版）
車輛提供：歐日汽車（26201010）

■新車沿用一台2.0公升直4偈，內附VVT-i設計，輸出平均有力，重有唔錯嘅操控感。