噚日帶大家睇過《GT4》精采場面，新加香港賽道的確令機迷振奮，今日就睇埋SCE另一重頭大作《Siren》，呢隻走恐怖驚慄路線嘅Game，遊戲內嘅動作取材自現實生活嘅演員動作同表情，加上懸疑音樂，恐怖度爆燈，只推介畀15歲以上朋友玩，重即場引嚟成百機迷排隊試玩。
記者、攝影：許福合
（PS2?11月6日）
呢次SCE專程為Siren喺會場搭建咗個木屋俾玩家試玩，所以吸引咗唔少人排隊，玩家各自會有連耳筒嘅PS2，畫面加上音響，真係要夠膽先可以玩。講番個遊戲玩法，同一般RPG相似，玩家要不斷解謎，間中還要與人戰鬥，唔夠打時可以選擇逃走，有時還可利用一個名為「視界Jack」嘅系統，變成以敵人嘅視點嚟觀看周圍環境，相當好用。
記者：《Siren》列明只適合15歲以上人士，是否表示遊戲內容偏向暴力及血腥？
藤澤：其實遊戲設計上只是較着重帶給用家恐怖氣氛，並未強調暴力及血腥，亦唔係15歲以下就唔適合玩。
記者：遊戲中特別強調人物嘅真實性，如何製作呢種效果？
藤澤：每個角色都會搵真人示範，利用八部攝錄機去記錄唔同角度嘅姿勢，以求有最真實嘅動作。
記者：《Siren》要如何喺同類遊戲中突圍而出？
藤澤：除咗畫面要求最真實效果外，破天荒加入敵方視點偵察環境系統，相信亦可為玩家帶來新鮮感。
同場加映：PS2眼仔鏡頭
喺SCE展館入面擺放幾部「EyeToy：Play」，亦曾經喺E3度亮過相嘅視像鏡頭，不過今次連遊戲盒面都有得睇，相信快將推出。呢個鏡頭仔主要作用係擷取玩家動作，跟遊戲內容作出即時互動效果，玩法唔算新鮮，不過遲啲可能利用PS2連線功能，跟遠方朋友玩視像會議都未定。
SQUAREENIX方面，雖然並冇萬眾期待嘅《FF12》試玩，不過就有唔少經典舊作翻炒。如《FFX-2》將一如過往推出國際版，除附有英文介面外，當然唔少得加入隱藏敵人、武器，較特別係副題加入LastMission，即係劇情方面有頗高嘅新發展。
另一搶眼翻炒作可算係《前線任務》，重做當年Hit到爆嘅超任版，喺10月23日推出PS版《前線任務1st》，畫面當然不可同日而語，暫時未知會否加入新關及新機體。而PS2亦有隻《前線任務4》登場，從畫面見機體互揪場面幾有逼力，介面亦好《前線任務》Feel，值得期待。
其實NAMCO嘅《RR》比《GT4》更早成名，Fans都唔少，今作《R:RacingEvolution》更係矚目之作。展館內擺放咗多部試玩機座，從現場感受，由畫面到競賽真實性都做得好好，尤其一向標榜嘅速度感更係一流，唔會輸蝕俾《GT4》。
（PS2?12月4日）
世嘉隻《忍：Kunoichi》讓玩家扮演女忍者緋花，不過就係現代版嘅忍者，衣着新潮兼且出招識得射激光，動作就一貫地多玩化，最正係可以「壁走」喺大廈外牆行走。
（PS2?04年）
KONAMI預定下年推出嘅《MetalGearSolid3：SnakeEater》亦可以喺會場睇到最新畫面，雖然還未可實際試玩，不過見到新版會轉為叢林做背景，要如何喺野外求生，就要考玩家嘅本領。
（PS2?04年）
今次《櫻大戰5》重點並非一眾固有女身上，而喺成個遊戲舞台移師到美國西部，女主角理所當然係西部牛仔打扮喇，而且重識得人馬合一嘅刀術攻擊，喺西部荒野度巡邏。
（PS2?03年秋季）
上集《零》叫好叫座，順利躋身經典恐怖Game系列，新作《零：紅蝶》照舊賣古屋驚嚇，遊戲圍繞天倉澪同天倉繭兩姐妹，鬼異布局甚有電影《姊妹情深》Feel。
（XBOX?03年11月）
《魔牙靈》為首個日本微軟開發嘅遊戲，故事重點係中古時代嘅日本，遊戲就主要以3D畫面進行，畫質有相當水準，進行戰鬥時，一般只需要使用一個掣，便可作出多種不同攻擊方式，而間中會有NPC角色幫手，聯合攻擊敵人。
