美股走勢轉弱，杜指上周五再跌30點，成個禮拜更錄得半年以來最大跌幅，納指則係17個月以來跌幅最大一周，港股上周四衝上11444後掉頭，沽壓亦明顯轉強，本來成交大增到213億元，理論上好市可再持續多兩三個禮拜，恒指有機會上試11600至11800水平，但外圍市勢未能配合，則港股再創今個升浪新高的機會無疑會減弱，待整固完成後，年底再向高位推進。
今個升浪，恒指低位係4月25日的8331，暫時高位係9月25日的11444，共上升3113點，若調整升幅的0.236或0.382，恒指可見10710或10255。由於本港經濟前景有改善，熱錢不斷流入，市底甚強，恒指調幅料不會大過0.382，在10710至10255間隨時會見底。
早在年中，高人已提出警告，話要小心10月個市，咁啱咁蹺，秋官又有新劇登場，若然大市果如所料般下跌，則「秋官效應」真係唔到你唔信。高人話10月跌市係擴散性，主要係受外圍影響，不過，跌市幅度唔會太大，最多只係1千幾百點。
其實，基金同大行亦明知大市會調整，但仍不斷入市買貨，理由亦一樣，就係佢哋估計大市調幅唔會大，即使大市真係跌到10255，計平均成本亦只係10850，到大市再展升浪，由低位回升時，好快就會上番呢個位，但基金已吸納咗兩個多月，肯定可以買夠貨，以迎接年底同明年嘅大升浪。
國企之中，山東國電（1071）係基金呢輪密密收集嘅對象。一直以來，電力股在基金投資組合中佔有重要比重，但以往集中在華能（902）同大唐（991）身上，現時加入山東國電，主要係佢未來擴展速度會加快，投資額會以百億元計，可以媲美華能和大唐，但PE則較低，若以仍屬保守的12倍PE計，山東國電股價已可見2.75元。
由今年7月開始，山東國電股價在2.1元至2.5元間上落，近日突破降軌阻力，且重上3條平均線之上，初步阻力在徘徊區頂部的2.5元，若衝破，量度上升目標為3.2元。基金現水平上車，相信冇3字頭唔會收手。
郭兆誠