中文大學物理系收會考尖子，本來唔係新聞，但因為楊振寧，就吸引咗記者去訪問。左丁山睇完啲新聞，原本冇乜感覺，但睇到一段報道：「記者問他們手持優異的成績單，為何不揀選醫科、工商管理等較吃香的科目。」（《經濟日報》，九月二十五日），忍唔住都要講幾句。
過往香港好多理科精英選讀數理化生，唔恨讀工管會計，但最近十年八年，香港人讀書為咗求職，非常現實，純理科已經吸引唔到最佳理科學生，叻仔叻女都去晒醫、法、工商、資訊工程。長此以往，香港人對科學重邊會有興趣、有人才吖，假如丘成桐、楊綱凱、黃乃正等中大科學家當年都讀會計，你話幾嘥料呢？
講現實，美國人都好現實㗎，佢哋啲大公司請人，着重多元化背景，唔好淨係獨沽一味——即係讀完BBA又讀MBA，佢哋喜歡一啲MBA嘅第一個學位係其他科目，例如科學工程、文科等，有兩個不同學科背景嘅人，更能睇遠啲，睇高啲，更能適應非常複雜、瞬息萬變嘅國際環境，如果淨係識得商科，未免視野狹窄一啲。
九A八A會考尖子為興趣選讀物理，唔好潑佢哋冷水，話唔定其中一個半個會成為廿一世紀楊振寧，假如佢哋日後要讀MBA，唔錯吖，正是進可攻，退可守。香港創業基金界嘅一位資深人物王幹芝（SimonWong），喺VC界無人不識，佢就係中大物理系及MBA畢業生。