上周，恒指升幅2.9%，電盈（008）升6.2%，地產股同銀行股亦急升，中移動（941）則落後，半個價位都冇移動到，企定喺20.55元。期指市場鬥撼，睇錯邊易輸錢，買已升得急嘅股份，又怕有回吐。博中移動炒落後，諗得過，起碼因為冇移動過，大市回頭嘅話，都未必撞板。
中移動Call輪正路對象，幾時都係9861，12月到期，輪價32仙，溢價3.2%，槓桿率6.4倍。想快趣贏（同輸），則向9656與9929埋手，呢兩件槓桿率大啲，壽命長啲，當然要畀高啲溢價。
過兩日，就係十一國慶，紅籌股有可能炒炒吓，賀國慶。華創（291）過去兩個月成隻生晒，由6.65元飛上9.05元，過去兩周最低調整到8元，整固一番後又再試有氣勢，上周五收8.60元，睇個樣，有機會趁國慶氣氛利紅籌再踢番上9字頭。
搵華創Call輪炒吓，發國慶財。主角係9721，10月底到期，輪價74仙，負溢價0.7%，槓桿率11.6倍，咪心頭太高住，博正股上番上次高位，即係升40仙，或6%，唔係大貪，揸隻輪即有5成進帳。隻輪已經平水，12倍槓桿率代表正股郁1%隻輪郁12%，爆炸力真係好勁。
章盛