數季初最威水嘅歐洲球隊，非德甲史特加莫屬。呢隊波唔止喺聯賽七戰不敗，最架勢係保得住清白身，一球都未失過。強勢還強勢，史特加禮拜三會響歐冠盃硬撼紅魔鬼曼聯，佢哋能否躋身一線球隊行列，過埋呢關至知。
查實佢哋精神領袖巴勒哥夫引退後，好多人都睇死呢隊波，點估到教練馬加夫操到隊波鬼火咁弗。
當然，歐洲賽係另一個層面，史特加自九八年攞過盃賽冠軍盃亞軍後，響歐洲舞台再無佳作，對住曼聯呢啲歐洲大鱷，怕且前鋒古蘭爾唔會有太多活動空間。史特加分組賽第一場已經輸過畀格拉斯哥流浪，呢次火併曼聯，要醒定啲啦。
同AC米蘭解約成為自由身嘅李華度，透露口風話有可能去英超落班，重話對加盟車路士有興趣！我求大俠就好奇怪，當初佢正因為經常無正選踢而同AC米蘭解約。究竟佢知唔知車路士𠵱家爭位情況都好嚴重呢？就連基斯普加盟咁耐都未踢過一場正選上陣嘅聯賽啦！
早幾日我求大俠提到前巴西鋼門泰法路因為迷信，唔肯加盟安玻里，重決定退休㖭。不過響意大利嘅泰法路球迷就唔使愁，泰法路已經決定喺帕爾馬長住，開間餐館謀生，隨時親自下廚㖭。呢位一代鋼門對手接球就冇得頂，唔知攞嚟煮嘢食掂唔掂呢？
前晚執法烏甸對國米嘅球證當達連尼，有唔少爭議判決，包括十幾分鐘就掟盧斯安奴出場。我求大俠覺得佢尺度係就係嚴，但勝在夠統一，烏甸嘅高特立完場前一式一樣犯規亦被逐。另外，兩隊上、下半場各有死球未開就被吹完場，咁統一，大家應該冇聲出。
拉科魯尼亞前晚喺西甲失豬畀奧沙辛拿，其實早就有先兆。講都冇人信，原來佢哋後衞羅美路前日到達潘普洛納機場時，居然響停機坪附近被蛇襲擊，咬親隻手，結果要瞓成晚醫院做檢查。有個球員黑仔成咁，隊波自然唔慌有運行，果然冇咗個榜首位。