歐陽妙芝昨日出席婚紗騷時表示明年將有人生大計，就是與拍拖八個月的男友Steven有共識拉埋天窗，目前只欠對方真正跪地求婚而已。歐陽妙芝如此一說，似乎在暗示男友要識做呢！
名模歐陽妙芝和Rosemary昨日往尖沙嘴馬哥孛羅香港酒店演出羅浮宮的婚紗show。早前嚷着減肥的歐陽妙芝表示已成功減磅，她說：「沙士嗰時最肥，有成一百三十三磅，𠵱家就一百二十八磅。我好有決心夜晚戒食嘢，不過我男友就成日搞破壞，話鍾意我肥啲，叫我陪埋佢一齊食。」
記者指妙芝感情生活美滿，何不叫男友養她？她笑說：「佢都有咁提過，今年我都會繼續工作，下年就唔知啦！我同男友好夾，我都視佢為結婚對象，大家都傾過結婚，不過佢重未正式求婚，我覺得未收戒指就重差啲嘢咁。」
另外，Rosemary早前被拍得與一男性朋友約會，她否認對方有意追求她，Rosemary說：「乜我唔可以有朋友嘅咩？𠵱家都係以工作為重。」
而早前Rosemary往廣州出席MichelRene時裝騷，其母自爆她將赴意大利參加賽車訓練，並獲名車瑪莎拉蒂垂青，有機與任賢齊同任中國區代言人，但事後卻遭瑪莎拉蒂方面否認其事。Rosemary對此說：「等對方公布我先會講，我唔知佢哋有乜嘢安排，因為全部都係媽咪負責。」Rosemary及後大談意大利學車之旅，她說：「今次好開心，佢哋請咗一級方程式賽車手IvanCapelli教我揸。」
此外，蒙嘉慧昨出席在屯門舉行的「黃金海岸酒店婚禮博覽2003」時，穿上全場最性感的婚紗，成為焦點。剛從南非返港的蒙嘉慧說：「我去南非拍旅遊特輯，肥咗四磅，所以今日啲婚紗都要改大啲。」
採訪、攝影：JessicaNgan、RachelWong
