「跌落嚟嘭一聲　失控衝前百呎」
婦跳樓壓中的士司機嚇呆

【本報訊】「突然一嚿黑影跌落嚟嘭一聲，跟住架車失控衝前百呎先停得低，真係嚇到我儍咗，揸咗十幾年的士都未試過『咁黑』！」元朗博愛醫院護理安老院一名老婦，疑因病厭世昨日凌晨跳樓自殺，墮下時壓中一部途經的士車頭，再反彈着地。老婦送院死亡，的士司機幸未有受傷，卻已被嚇至魂飛魄散。　記者：黃江奇

現場為元朗博愛醫院賽馬會護理安老院對開，通往「二十四小時門診部」的汽車通道。昨日凌晨三時許，安老院內一名患有多種老人病姓吳（八十七歲）老婦，疑因病厭世從四樓露台跳樓自殺，剛巧壓中一部正駛往「二十四小時門診部」兜客的新界的士車頭。

車蓋凹陷爆玻璃
「突然一嚿黑影跌落嚟嘭一聲，我本能反應煞車，阿婆跟住碌咗落地上，個車頭蓋凹晒車頭玻璃裂咗，車頭引擎被撞壞停唔到架車繼續衝前，駛前成百呎我大力煞車同熄匙先將車整停，真係嚇死我啊！」突然飛來橫禍，姓謝（四十二歲）的士司機被嚇至驚魂不定，情緒久久未能平復。
老婦墮下壓中的士巨響惹來醫務人員走出查看，見的士司機呆坐車內神情驚恐，遠處有一名老婦倒卧地上，立即報警，老婦被送往屯門醫院後證實死亡。

「重要畀錢整車」
「真係『黑仔』，平時我好少入醫院兜客，一入嚟就『中招』，揸咗十幾年的士都未試過咁，真係嚇死我。就算係隻貓，換轉係你一樣會好驚，何況今次係個人！除咗被『嚇餐飽』之外，重要畀錢整車，你話慘唔慘！」自稱「黑到痹」的謝先生一臉無奈地說。