香港超級富豪訪京團獨享會見國家最高領導人嘅待遇，證明偉大祖國與時並進，「走資」呢條路一定唔會行返轉頭。
見權貴之餘都要精力十足先至頂得住，噚日一早八點幾，班慣於勤力搵銀嘅富豪已經起晒身，帶埋仔仔女女去所住酒店貴賓樓嘅紅牆餐廳食自助早餐，但淨係互相打招呼嘅時間重多過食嘢時間。
唐唐媽媽尤淑圻因為要裝身，遲過老公唐翔千落樓，之後唐太遇見全國政協常委張永珍同佢千金鄭禕，之前為兒子忍口多時嘅唐媽媽如同開籠雀，三個女人一個墟吱吱喳喳個不停。
富豪林百欣雖然帶「養子」林建康北上，但佢話有睇過另一個仔建岳投資嘅《無間道》，聽日《無間道Ⅱ》首映亦會捧場。佢又話唔退休住，因為怕冇寄託。
但亞視行政總裁陳永棋就食咗一記悶棍，見到商務部副部長安民時，陳永棋熱情地話多謝佢對香港嘅支持。點知出名直腸直肚唔畀面嘅安民即刻話，唔係我，係中央嘅支持。
（圖）唐媽媽尤淑圻（右）同政協常委張永珍（左）及其千金鄭禕（背向）齊齊食早餐，三個女人傾餐飽。
傳真︰2623-9278
電郵︰