吳鎮宇在《無間道II》內飾演的黑幫龍頭倪永孝，誓要力保父親打下的江山，鎮宇信心爆棚地指導演找自己演這個角色，是因為自己渾身散發着倪永孝的氣質。提到娛樂圈這個江山，鎮宇回答得小心翼翼，和城府甚深的倪永孝角色，不謀而合。
十月一日香港黃金周正式開始，相信到時大批內地市民會來港刺激經濟，香港似乎又進入最好的時代。
同日，韓琛、黃Sir、陳永仁和劉建明再度重現江湖，正邪對立再起風雲，香港似乎又步入最壞的時代。
十月一日（周三）是新片《無間道II》在港正式上映的日子，戲中飾演黑幫頭子倪永孝的吳鎮宇，日前神態自若地在銅鑼灣接受本報訪問，早前曾志偉曾笑說：「今次係眾星拱照吳鎮宇。」
對此美言，鎮宇即時笑說：「唔好聽佢講笑，其實倪永孝唔係大家所形容為一個城府咁深嘅人，佢係高智慧同冷靜嘅人，佢喺戲入面成日會講一句說話：『出嚟行，預咗要還！』呢個係個幾重要嘅訊息話畀觀眾知，有冇諗過還唔還得起，就算去到黑幫龍頭，下場都有目共睹。」
去年，吳鎮宇因為檔期問題而推掉《無間道》的演出，當時他可選擇演黃Sir或韓琛，今年第二集，他則選擇演倪永孝這角色，假若要重新選擇，三個角色中他會選哪個？鎮宇苦思一會說：「我都係會揀做番倪永孝，我鍾意佢有型，我冇見過呢種elegance（優雅）同埋受過高等教育嘅角色，對我嚟講係一個挑戰，我覺得我根本有呢種氣質散發出嚟，而唔使刻意去演。」
去年，《無間道》一出，票房輕易超過五千萬，今年新片加入了吳鎮宇、劉嘉玲同胡軍等重量級演員，主線亦落在鎮宇、秋生和志偉身上，與一眾演技派大鬥演技，鎮宇可感大壓力？他笑說：「直情開心到癲，我覺得最後嗰日煞科戲亦係最好玩嗰日，大家唔使再孭住個角色，但真係冇分邊個做好啲或邊個做得唔好，大家都係用演技去打動觀眾。」
今次首度跟余文樂及陳冠希這輩偶像級歌手合作，鎮宇覺得他們表現如何？鎮宇深思熟慮後說：「我同陳冠希冇對手戲，但希望佢哋經過呢次經驗，令觀眾對佢哋改觀，志偉曾經喺現場叫佢哋唔好一拍完就匿入保母車，應該留喺現場睇吓其他演員點處理投入一場戲。我覺得余文樂諗得太多，佢成日擔心梁朝偉演得太出色，冇得同對方比較。諗得多係好，但唔應該諗呢啲嘢，做番自己就最好。」
鎮宇以表演工作者自居，因為一個表演工作者是要訓練到自己的身體，每處皆可作為一個表演工具。由八五年無綫訓練班畢業至今，鎮宇絕對不是獲獎最多的男演員，但絕對是生成攞獎命，先後成為金馬影帝、香港影評人協會「最佳男主角」等。
同期能夠與鎮宇相輝映的，則有梁朝偉、黃秋生、梁家輝等，同行如敵國，鎮宇如何看他們的演技呢？他顯得甚有保留地說：「嘩，呢條問題好難答，不如咁啦，話反而可能同邊個做到朋友，我同秋生就根本唔做朋友都唔得，至於Tony（梁朝偉）我同佢去過一次越南嘅亞太影展，食過一次飯，總之我覺得佢喺《花樣年華》畀我好圓滿嘅感覺，而家輝就未合作過，見面會係『Hi!Hi!』咁。」
鎮宇續說：「我係一個咁嘅人，一齊拍戲時會乜嘢都同人講，好似拍《又又雄》時，同黎明、鄭伊健一見面就乜都噏一餐，車呀、電腦遊戲等等，𠵱家都想三個人出嚟，靜靜哋咁飲吓酒傾吓偈。」
