港股上禮拜創出年幾新高，成交日日過百億，有兩日重有成二百億㖭，唔少市民都重投股海大炒一番。不過，八方在此提醒各位股民小心「秋官效應」。鄭少秋下個禮拜一（十月六日）有新劇出街，雖然套戲叫做《非常外父》，唔似講股市，但各位散戶都係小心啲好。
話說九一年秋官為無綫拍長劇《大時代》，扮演丁蟹一角，並以沽期指將股市推低而致富。劇集播出之時，現實中嘅股市真係出現小股災。之後每次有秋官嘅新劇出街或者舊劇重播，股市或多或少都會跌。
最厲害嘅一役應該係九七回歸後嘅金融風暴，全球股市皆跌，巧合嘅係秋官嘅《江湖奇俠傳》，當時正喺亞視播映，播映期間，港股跌市持續，跌幅差不多達三成。九九年重有個賭仔入稟告秋官令佢精神上受損。
到咗○○年九月電視劇《世紀之戰》喺亞視啟播，丁野（鄭少秋）重出江湖。港股連跌七日，直挫二千五百點，搞到啲分析員都唔識解釋，有美資經紀行撰寫報告論述「ChiuKwaneffect（秋官效應）」。點知到咗十一月，丁野一死，港股即大升三百點，真係港股明燈。
講番秋官下個禮拜套新戲，佢咁蹺又係姓丁，當然唔係叫丁蟹，叫丁貴妹，不過，劉兆銘扮演嘅角色竟然叫做丁蝦，唔知同丁蟹有冇淵源呢？
傳真︰2623-9278
電郵︰
