𠵱家啲年輕人盲目追捧偶像，好多時偶像做乜佢就做乜，為免教壞人，藝人平時嘅言行舉止真係要好小心啲至得！就好似Cookies咁，前晚佢哋出席一個音樂會時，成員Kary因為怕唔記得歌詞而將歌詞抄喺隻手度，點知講講吓佢竟然自爆讀書時將啲課文抄喺隻手度出貓，而Miki就話自己出貓好水皮：「默書嗰陣我將張貓紙夾喺默書簿度，但最後因為怕俾老師發現唔敢攞出嚟，搞到默書得零分。」
至於Theresa同Stephy，就自爆一個將啲課文抄喺枱，另一個重離譜到攞本書擺喺枱度抄，Theresa話：「我俾阿Sir發現咗之後叫咗出去，但佢竟然冇罰到我，佢本身真係有啲問題。」佢哋愈講愈興奮。但馮仁昭認為，呢啲行為唔係一件光采嘅事，佢哋咁講分分鐘有人有樣學樣。好在後尾佢哋話既然Miki出貓都係得零分，大家都係勤力讀書好過。
另外，Miki前晚繼續着走光褲出騷，由於之前佢走光兩次，所以前晚專登着條格仔襪褲打底，咁就萬無一失啦！
何韻詩噚日出發去陝西，探訪當地嘅學生，佢話去到會住喺窰洞，重話嗰度冇水沖涼，早知就帶啲畀貓用嘅
今日係韓君婷生日，早排佢收到一份好大嘅生日禮物，就係一個燕窩廣告合約，開工嗰日老闆娘重送咗個燕窩蛋糕同佢慶祝生日。韓君婷話其實佢好想收到鑽石做生日禮物，但佢亦知道冇幾多個人會送鑽石畀佢，問佢有冇男仔約佢過生日，佢就話𠵱家拍拖對佢嚟講唔重要，寧願同一大班朋友慶祝喎！
陳鍵鋒噚日出席港台活動，下月電視城啟用大典，但被無綫力捧嘅新人陳鍵鋒就冇份出席，佢話：「我要去荷蘭登台。」問佢覺唔覺得咁樣會損失咗個大好機會親近六叔，佢即笑答：「咁多人，都未輪到我啦！我只不過係八打廿四，連二打六都唔係！」可以咁謙虛都已經算成功咗一半啦。
韓國百變天后朴志胤，近日自爆曾經有一個一級男星要求同佢有不道德交易。話說上個月朴志胤原本接咗套戲，第一次同嗰個內定男主角見面，就獲對方邀請去佢屋企睇帶，朴志胤sayno之後，男星重以為佢唔明，改口話：「屋企唔方便，去酒店都得㗎！」嚇到朴志胤連戲都寧願唔拍！
一位陳先生噚日打電話向本報投訴，話亞視噚日播錯宣傳片。亞視嗰段宣傳片係話當晚會現場直播皇家馬德里對波圖嘅賽事，陳先生話噚晚應該係皇馬作客華倫西亞至啱。馮仁昭向亞視了解，公關部回覆承認出錯宣傳片。
而嗰條出錯片段，應該喺星期三凌晨播出至啱，亞視話不便之處，敬請觀眾原諒喎！
