Twins成員蔡卓妍（阿Sa）的九十一歲外公，日前與阿Sa母親到酒樓食飯時，疑因表弟妹過於嘈吵，惹起一男子不滿，衝入她母親和外公的房間，並打了其外公一巴。
二人組合Twins昨日在尖沙嘴海運大廈舉行「TwinsLoveHK」簽名會，吸引約四百名fans排隊索取簽名。大會擔心秩序混亂，聘請了十多名保安維持秩序，但因有舞台分隔排隊的fans，而且fans亦分批入場，秩序井然，故未有發生混亂。
不過，昨日蔡卓妍表現得十分勞氣，她一到場即向記者大吐苦水，表示其九十一歲外公日前無辜被打，阿Sa說：「嗰日我媽咪同公公去酒樓食飯，我就唔喺度。佢哋雖然喺房度食，但現場因為有啲表弟表妹喺度，所以比較嘈咗啲。結果隔籬房有個三十幾歲嘅男人走嚟媽咪間房，叫佢哋細聲啲，話有個小朋友瞓咗覺。
「當時我媽咪好禮貌咁同佢講，話瞓覺應返屋企瞓，但個男人好唔服氣，係咁倔住佢哋唔肯走，我媽咪叫部長入嚟叫嗰個男人走，咁啱我公公啱啱去完洗手間返入房，個男人可能怒氣未消，竟然一巴掌打落我公公塊面度，媽咪即刻報警。點知個男人扮嘢話自己飲大咗，猛同我公公同媽咪講對唔住、唔好意思，咁公公同媽咪就算數唔追究囉！」阿Sa表示，她生平最憎恨兩種人，分別是欺負老小和打女人的人。
此外，鍾欣桐（阿嬌）昨日亦為容祖兒（Joey）平反，事緣近日有報道指Joey與謝霆鋒因人氣跌而要黐實Twins，阿嬌說：「真係好無聊！嗰日我同Joey一齊喺機場買嘢，佢係我朋友，佢唔陪我，唔通一個人企到成丈遠咩？」
採訪：汪正文 攝影：仇志德
