上個禮拜個市真係可以用「癲鳳鬥狂龍」嚟形容，喺外圍市一片利淡走勢下，恒指反而大成交升到最高11444點，唔少淡友慘敗喺大戶挾倉潮下。
伏勝早前提過做忍者龜嘅彩星（635），話說管理層上幾個禮拜已經搵咗班分析員傾過偈，班分析員喺見過管理層後，都攞到一批好料去做報告。有朋友話呢隻股真係今年最後一季嘅明星股，一定要好好留意，原因係前一排忍者龜又再喺美國興番，有分析員話，計晒佢哋原來嘅業務，再加埋新返嘅忍者龜定單，今年個業績可以上升超過3成，隻股年底應該可見兩蚊。如果用上星期五個價計，潛在升幅重有3成半左右。
睇番隻股上個星期嘅走勢，買盤開始有番啲規模，不過礙於大市波動太大，伏勝建議大家要買貨都係等隻股回番多少先好郁手。
上個禮拜提過個隻御泰金融（555），表現都算唔錯，佢嘅姊妹公司御泰國際（155）嘅表現原來重勁，兩隻股份試過雙雙打入十大升幅榜。原本呢兩隻股都屬於揀唔落手嘅籮底橙，不過喺新大股東入主咗之後，一改兩間公司以往洗腳唔抹腳嘅惡習，結果喺大刀闊斧削減成本下，兩間公司都開始轉虧為盈，雖然賺嘅錢唔係好多，但可以證明到一件事，就係大股東都算有良心，冇將股東嘅錢亂使。伏勝聽聞隻股仔將會好事近，話會有啲舊資產可以分拆出嚟，到時執到幾多話會同啲股東分享㖭，大家不妨留意一下。
伏勝