𠵱家潮流興講健康，無論係唔係明星，都會揀啲好刁鑽嘅心頭好。唔知我哋熟識嘅明星又會鍾意點食嘢？原來日本女星米倉涼子就只食韓國出口嘅泡菜，安達祐實食乜都要加豉油，佢哋個個都有好奇特嘅飲食習慣！
啱啱宣布發展台灣市場嘅安達，真係大個女啦，因為最近佢搬咗出嚟一個人住，朋友介紹咗隻香川縣出品嘅豉油「鎌田醬油」畀佢，即刻視之為寶。鍾意清淡食物嘅佢話：「以後我無論食菜、魚、沙律、麵，都會加呢隻豉油食，去外景都帶埋去！」真係服咗佢。
我羅拉好耐之前已聽聞日本藝人好注重飲食嘅品質，個個都飲私家水，而酒井法子亦唔例外，佢話：「我拍月曆時去到屋久島，發現呢隻好好飲嘅水，之後我已經唔可以再飲其他水啦！」
已經變成半個日本人嘅尹孫河，最愛嘅食物都係日本北海道出品嘅「六花亭士多啤梨雪糕」。尹孫河真係好鍾意呢種雪糕，佢話：「外面硬硬哋，裏面係士多啤梨，包你食到唔停得口！」
泡菜可以殺菌同消脂都講咗好耐，但香港人似乎麻麻地鍾意，不過不少日本少女就趕上呢股泡菜旋風，當中梗係唔少得去過韓國拍戲嘅米倉涼子啦。原來米倉十年前已經開始每朝食泡菜，佢話：「我每朝唔食就會覺得若有所失！」唔通米倉全靠泡菜keepfit？