港股噚日主要在11300水平浮浮沉沉，恒指最後升3點，收報11290，成交縮至不足140億元。睇嚟期指大局已定，好淡雙方暫時唞唞氣，準備10月再戰魚缸。
最近港股大升，但燃氣股則因為國內接駁費增值稅一事未清晰而落後大市，不過鄭州燃氣（8099）證實獲華創（291）垂青，可能會引起市場注意燃氣股。華創有心進軍燃氣市場，又點會只限於鄭州燃氣。據Cookie話，華創主要想搵隻燃氣股做旗艦，然後進軍全國燃氣業務。
華創此舉可能觸發一場燃氣股尋寶遊戲，鄭州燃氣噚日升1.3%，收報0.77元。但其他燃氣股暫時冇乜表現，華燊燃氣（8035）及百江燃氣（8132）分別跌1.2%及1.4%。
奮發國際（1130）配售1.7億股，每股4.8仙，集資816萬元。配股價較停牌前收市價大幅折讓20%，但股份噚日復牌後不跌反升，全日收報9.6仙，勁升60%，認購者帳面已賺1倍。
黑客話，此股一向成交少，冇乜散戶跟炒。據講今次配股，係配畀有心人作為炒作之用，但噚日此股勁升，聽講目的只係mark高個價，方便有人容易獲得孖展，其實未正式開車，所以成交只得2.82萬元咁少。
太平協和（438）私有化作價只係每股0.65元，竟然可以獲得股東會順利通過，真係奇怪之極。唔通小股東怕咗太協一旦私有化失敗，就會玩供股？上周停牌前股價造0.61元，小股東叫做可以執多4仙。
阿虎