將於十一月尾約滿無綫的古天樂，前晚於銅鑼灣出席活動時，主動透露無綫仍未有人與他傾談續約一事，古仔感到失落和憂心之餘，為表誠意，他公開表示願意削減薪酬，與無綫共度時艱。
古天樂前晚到銅鑼灣崇光百貨為HugoBoss全新香薰的大型廣告板主持揭幕儀式，對於有報道指他的緋聞女友鄭秀文與許志安復合，古仔慘遭踢出局，他表示不會作出回應，並隨即主動向記者透露有關與無綫續約的問題。
古仔說：「我同無綫十一月約滿，但係到𠵱家都冇人搵我傾約。」問他是否正考慮續約時，他說：「人哋冇搵我，我冇理由自己諗㗎！其實我係TVB嘅人，過去幾年啲人都唔覺眼我喺TVB。」
古仔續說：「可能佢哋要搞嗰個二十二億嘅電影城（應為電視城），忙緊啩。」問到古仔是否感到未受重視時，他說：「咪係！可能佢哋以為我重視電影多啲啩。其實我不嬲都好有誠意拍電視劇，呢個係一個考驗，我都好想可以快啲拍到一部劇集，不嬲都想拍一部四十集嘅，只不過時間唔啱。」
現在無綫正鬧小生荒，但古仔卻認為世事難料，更自嘲可能已被打入甘草行列。談到續約的條件，古仔更表示願意與無綫共度時艱，他說：「其實我自己都心中有數，求祈同我講個價我都開心到飛起。𠵱家條件已經好好，合作咁耐大家都好熟。其實佢哋要加少少佣都冇所謂，大家共度時艱。」
無綫總經理何定鈞昨日出席港台節目巡禮，對於古天樂表示無綫還未與他傾續約的事宜，何定鈞說：「係咩？等我向藝員部了解吓先，其實古仔重爭公司好多工作，佢嘅經理人合約都係我哋嘅，咁我哋關係都好好，我會問吓嘅。」
採訪、攝影：卓美娟
