臨近9月底季結,唔少芬佬揸住嘅股份,股價都出現異動,經紀黃估計亞洲鋁業(930)會係其中一員。
亞洲鋁業股價喺8月底開始上升,9月頭一度升過上去1.50元,無幾耐就出現咗兩宗非自動對盤大成交上板,加埋有成1億股,每股作價1.27元,之後股價就輾轉回落,周四最低見過1.20元,但跟住立即反彈,走勢明顯轉好,噚日更大升7%,收1.37元,成交金額增加至6900萬元。
經紀黃話,據講亞鋁嗰兩手大成交,係由一個基金轉去另外一個基金,為咗批出呢手貨,有人將股價mark高,之後股價回落其實相當正常。
前兩日,有間向來跟得亞鋁好貼嘅美資證券行,出咗個報告唱好亞鋁,目標價1.75元,故此亞鋁股價即刻回升。
嗰份報告主要話亞鋁前景秀麗,手頭定單足夠15個月的生產。但最有point係話美資策略性夥伴,諗住執咗自己部份北美生產業務,轉而落單畀亞鋁,所以亞鋁盈利將會有保證。
慕容小初