導演杜琪峯𠵱家重喺台北為佢部電影《向左走．向右走》做宣傳，但前晚佢神神秘秘走咗去位於台北遠東飯店三十八樓嘅LungeBar，原來佢約咗性感尤物林熙蕾夜會，兩個人重坐咗喺酒吧嘅隱蔽角落，一齊歎紅酒，而林熙蕾重講廣東話，同杜琪峯密密斟㖭。
林熙蕾平日比較cool，唔係太多嘢講，但嗰晚佢就一反常態，同杜琪峯傾到雞啄唔斷，佢哋傾咗個零鐘後就各散東西。杜琪峯重好有風度，主動埋單至走人。杜琪峯以前搵過林熙蕾拍《暗戰2》同《全職殺手》，聽聞佢又想搵林熙蕾喺年尾開拍一套講女人心嘅新片《加州酒吧》，佢重問林熙蕾嘅性感尺度可以去到邊，而林熙蕾就話只要唔露點就乜都得。
另外，王菲亦都身在台灣拍MV。前晚佢開完工之後，就去咗台北松勤路嘅「同壽司」食飯，而徐克同佢老婆施南生又咁啱同王菲住埋同一間嘅西華飯店，不過徐克就唔係同王菲操刀拍MV，只係過嚟同朋友傾嘢，而佢同王菲就冇乜緣份，住埋同一間飯店都無緣碰頭。
應采兒噚日同袁彩雲、周汶錡等人，出席金鐘一個護膚品活動。平時藝人話去日本做嘢一定好開心，但應采兒話星期一去日本北海道拍攝新戲《七年之癢》就好鬼愁，因為之前日本發生地震，佢怕到時會有餘震，佢話：「我好驚呀！𠵱家好想買份保險畀自己，連同我一齊去嘅助手都要有。本來重好開心plan咗買好多！希望可以冇事返到啦！」
薛家燕（好姨）近來一直都有幫百佳做宣傳，咁啱百佳同新城都係李嘉誠旗下，而好姨又幫新城打工，所以噚日兩間公司嘅宣傳活動，好姨都有出席，問佢有冇錢收，好姨話：「收利是囉！因為兩間公司合作，人工會有特別安排，代言人有同我傾過，不過我覺得逐次計會抵啲。」好姨撈得咁掂，同佢數口精都好有關係！
珈潁（左）、謝雪心兩母女噚日去尖沙嘴大富豪幫亞視一個新節目拍外景，點知俾人以為佢兩個係夜總會嘅媽咪同女，現場佢哋又唔知點同人解釋，事實佢兩個又係媽咪同個女嘅關係，真係好複雜。兩母女第一次去大富豪好開心，珈潁話：「入面好大，有七萬幾呎，重有一架老爺車可以繞場一周，真係好威啊！」
曹永廉（右）噚日喺將軍澳廣播城玩《橫掃千金》。曹永廉話自己有策略，但係衰在記性唔好，所以都無諗過會贏，問佢點解記憶力咁差，佢話：「我十幾歲開始就食減肥藥，食咗十幾年，醫生就話係副作用。」佢又話：「咁我屋企人遺傳係咁肥，我又好易肥，做呢行唔可以太肥，而且我又唔高，所以一定要keep。」
