潮流興豐胸，雖然唔係話一定大先至係好，但無論係巨乳定係平胸女星，都有佢一套獨門嘅美胸方法，着起衫嚟先至會露得靚，我羅拉最近就搜集咗四位新紮女星嘅秘方，伊東美咲、佐藤江梨子、原史奈同仲根霞都話要個胸靚，除咗要識揀bra外，重要留意好多飲食習慣！
做開model嘅伊東都坦白認自己係平胸一族，佢話：「做女人嘅，梗係緊張自己個胸，我最理想嘅，就係唔太大唔太細，夠圓同向上嘅胸部！」為咗幫個胸扮靚，伊東會買日本某牌子度身訂做嘅bra，而且個胸都搽勁貴嘅美白精華！
天生大胸嘅佐藤，根本唔使好似一般女仔咁，着有鐵線嘅定形谷胸bra，佢話：「我覺得有鐵線呼吸好辛苦，而且對胸部皮膚唔好，所以鍾意運動型嘅胸圍。」此外，佐藤覺得多飲蜂蜜同食維他命C，都有美乳作用。
同伊東一樣好瘦嘅原史奈，始終重係走緊水着女星路線，所以識show胸好緊要，佢對戴隱形bra好有研究，佢話：「我戴開矽製嘅nubra（隱形bra），我特登買細兩個cup數，戴上去谷胸效果好勁，揀啱牌子嘅話戴成日都唔會甩。」
仲根霞基本上搽乜嘢上面，就搽乜嘢上胸，再加埋豐胸精華素，個胸真係補到不得了。另外佢每個星期最少去一次做gym，佢話：「咁樣就可以keep住胸嘅線條。」霞女又話佢個胸成日出粒粒油脂，但最近去到鄉下地方石垣島發現一支神仙水，簡直打救咗佢個胸。