九月二十三日本欄講《白日打劫》，講到英國嘅電視牌照費。分析師W小姐睇完對左丁山講：「梗係唔畀啦，我喺李斯特城讀書之時，啲留學生冇人肯畀電視牌照費，人人都博懵，英國人講到交稅，亦都唔係老實人啫。」
但係博士Y就寫英文電郵嚟，講到：「我喺劍橋讀書七年（直至完成博士課程），有四年都冇電視睇。劍橋地區經常有政府人員巡查街道，利用特別儀器偵查屋內收睇電視時發出嘅『輻射』，直情可以知道你在屋內睇緊乜嘢節目。好多劍橋學生宣稱自己俾『電視特警隊』捉到，罰款係電視牌照費嘅四倍！窮學生於是唔敢買電視，或者只係睇黑白電視——嗰陣係八十年代喎，你話幾荒謬，所以我好憎BBC。」
大概英國政府徵收電視牌照費，係為咗津貼BBC嘅營運費用。今日英國嘅電視牌照費（彩色電視）係一百一十六鎊一年，如果全部英國家庭都肯繳交，英國政府年入超過十四億鎊，條數都幾大㗎！不過電視牌照費分明剝奪窮人嘅資訊權利，對窮等家庭、窮學生好唔公道。買個十四吋彩色電視只需二百鎊，一年牌照費竟然要一百一十六鎊，直情係㩒住搶。
此外，畀完牌照費都只係睇到五個免費頻道，要睇曼聯對阿仙奴呀？訂SkyTV（天空衞視）啦！月費要幾多，SkyTV頻道有如香港有線電視，但係收費更高昂，月費超過五十鎊！留學生惟有舉手投降。