隔晚美股唔多妥，好多人估話港股今回都好難有運行，結果又跌眼鏡。恒指埋單有3點進帳，又係中銀（2388）照住個市，收11.60元，升35仙。
昨日開市，即刻見到有心人做嘢，唔畀個市跌，恒生（011）以95.75元開出，嘜高1.75元，真係買貨，使乜出咁嘅價位？最後恒生收94.25元，只有25仙進帳，但中銀仍然高收。
中銀或銀行股近期擔大旗之後，下個回合，輪到邊類股份做主角，成為話題，當然估中同埋有做嘢嘅話，就可以搵真銀。電訊股係可能嘅主角。
電盈（008）昨日威過其他同類股，收5.15元，升10仙。隻熱門電盈Call輪9791，比較特別，連續兩日大成交，收98仙，升14仙，跟足正股都只係應該升10仙，𠵱家升突，擺明有啲意義，一係升過火，一係升在正股前頭，預示正股會有較大動作。電盈Call輪炒作對象，離唔開9791，吼反覆之時買貨，升上去散水。
聯通（762）升10仙，升幅1.6%。聯通Call輪冇幾多可以揀，9884可以諗吓，只不過年底到期，溢價11.8%嫌高咗啲。中移動（941）升5仙，收20.55元，Call輪好多隻，唔同數據，啱唔同炒家玩。
章盛