華叔司徒華噚日喺中大教育學院「校友成就獎」頒獎典禮上，向在場近百名教育界人士講咗三個關於動物嘅古仔，都幾有趣，同大家分享吓。
美國阿拉斯加愛斯基摩人捉野狼，會將一把染血嘅刀埋喺雪地上，野狼聞到血腥味，會走過去舔血刀，舔個不停，啲狼唔知條脷俾刀割損，仍津津有味，最後失血過多昏倒，獵人就咁捉到野狼。
話說森林裏面有一族猴子都係啞巴，其中一隻猴子於是出發去搵解藥。佢搵神仙、山林隱者同學者，都幫唔到；最後搵到魔鬼，對方話可以幫到佢哋，但條件係班猴子以後只可以講魔鬼准講嘅嘢。
一個富翁搞咗個宴會，會上一個藝人喺布幕後扮豬叫，出席嘅嘉賓同聲同氣話好似；之後有個僕人話自己都識，走去布幕後面扮豬叫，但啲人猛話唔似，一個嘉賓衝上台，拉開布幕一睇，原來真係有隻豬叫。
喺現場聽華叔講古嘅沙田崇真中學校長葉秀華認為，華叔講嘅係政治問題，捉野狼故事係話啲人為咗私利，不顧一切；啞猴子係想講言論自由問題，比喻有啲人口不對心；扮豬叫係指社會上有啲人唔聽真正聲音。佢話，華叔係想叫教師教學生要聽真話、做真事、唔好為私利而受誘惑。
聽落好似有政治含意，但華叔唔肯講故事嘅寓意，只叫大家自己諗；佢又呼籲教師多啲同學生講古仔。你又點理解華叔三個古仔嘅含意呢？
（圖）華叔講嘅三個動物古仔，究竟係咪真有政治寓意，大家可以自己諗吓。
傳真︰2623-9278
電郵︰