德國平治車廠響今屆法蘭克福車展上，展出一款全新VisionCLS概念跑車；佢不但造型極具吸引力外，闊落車廂空間更足夠乘坐四名成人，而出眾性能表現亦係賣點之一。
響外形設計上，VisionCLS概念車係以Coupe跑車形象示人，造型極具流線型外，亦顯現出一份誘人魅力；而四門設計，更能為乘客上落車時，帶來不少方便。至於車廂方面，除咗來得寬敞闊落外，前後兩排座椅又見有十足承托力，乘坐倍見貼服舒適；而鮮色嘅車廂顏色組合，望落亦見有一份吸引力呢！
然而，呢款VisionCLS概念車將會用上一台六汽缸嘅CDI柴油引擎，廠方雖未有提及有關引擎容積嘅數據，但馬力輸出卻高達265匹，而響2000rpm低轉下，更可發出57.1kgm嘅扭力峯值，並附以全新7G-Tronic嘅7前速自動波箱，難怪新車0至100公里加速度僅為6.4秒，而極速更達250km/h㖭！與此同時，廠方更為其安排有AIRMATICDC氣壓懸掛及跑車化底盤結構，可有助增強操控表現㗎！