關之琳前日四十一歲生日，男友黃家諾一早就送咗神秘生日禮物畀壽星女，今年之之同男友因為要喺北京公幹，佢哋同劉嘉玲、胡兵同瞿穎等前日中午先拍拖出席咗法國眼鏡活動，之後法國眼鏡設計師AlainMikli就請咗眾嘉賓去咗北京一間酒店度晚宴，順便同之之慶祝埋生日喎！
AlainMikli前日喺宣傳活動上，見到打扮性感嘅嘉玲，立即嗒晒糖，AlainMikli重發揮咗法國人熱情如火嘅性格，手多多咁彈嘉玲嘅bra帶，嘉玲即時大發嬌嗔鬧佢「鹹濕」。
AlainMikli前晚喺晚宴上，又好鬼貪心，一於左右逢源，佢坐咗喺嘉玲同之之中間，佢一時就同之之喁喁細語，但個心又唔捨得身邊嘅嘉玲，所以成日將個身傾向嘉玲嗰邊。
AlainMikli次次見到靚女都色心大起，馮仁昭最唔抵得係佢成日都恃住自己係法國人，扮晒有性格，其實就好乞人憎。
陳寶珠將會喺無綫主持一連四集嘅新節目《與陳寶珠談情說愛》，噚日喺將軍澳電視廣播城見到佢同第二集嘅嘉賓范徐麗泰錄影，寶珠姐重送咗隻《黃河協奏曲》CD答謝范太做佢嘉賓，今次係寶珠姐第一次做電視兼第一次做主持，佢個仔楊天經、契爺曹達華、妹妹陳寶儀會做嚟緊嘅嘉賓。
亞視攞到大陸落地權，又跟中央關係良好，所以做亞視藝員係特別多機會喺內地發展，好似做司儀出身嘅朱慧珊就係一個好例子，最近朱慧珊就被欽點做十月一號國慶司儀，所以佢噚日就特登去連卡佛揀鑽飾，準備當日去威威，佢話：「我就搵阿WalterMa幫我做一件紅色晚裝，所以專登嚟連卡佛揀鑽飾襯番。」
曾經患過癌症嘅霑叔，對於宣布患有子宮頸癌嘅梅艷芳有啲忠告，但係佢嘅忠告就與別不同，佢話：「我同佢都熟，但就好少聯絡，我覺得佢唔應該公開件事，清心靜養吓。香港實在有好多善心人，之前我就收過四十張藥方，我個心好感激，但亦覺得好煩。我冇理由做試管啫，惟有聽醫生話，醫唔好就認命囉！」
羅慧娟噚日接受陳永祿訪問，大談健康之道。娟妹幾年前潛水出事，耳仔失去部份聽力，難得佢好睇得開咁話：「生活健康咗，𠵱家年年做身體檢查，重要開出事四周年party慶祝。」講到財富健康，佢試過九七高峯期加入買股票、炒樓行列，最終痛苦收場，問佢損手幾多，佢即時話：「我間歇性收唔到呀！」
