美股前晚大跌150點。阿虎心諗，港股周二急升過後，斷估噚日都應該有過百點調整，點知游資動力真係威猛，大市最多升過149點，再創今年新高，尾市才出現回吐，恒指收報11286，微跌9點，成交更高達213.55億元。黑客話，下周一期指結算，未平倉合約逾7萬張，好友當然唔會放生班淡友。
日本信用（626）私有化失敗後，股價升破5元大關。太平協和（438）亦於今日表決私有化計劃，原本私有化作價每股0.65元亦算吸引，但最近股市大幅上升，相信太協股東肯接受私有化唔多，斷估今次私有化計劃會失敗收場。至於此股私有化失敗後，股價會否好似日本信用大升？阿虎就唔睇好。
日本信用私有化失敗後，並無出現震倉就大幅炒上，據聞公司有意申請銀行牌照，變身成為持牌銀行，如果成功變身，當然有望被分析員重估身價。
新怡環球（1094）與奮發（1130）雙雙停牌。據聞新怡主席李文化賣盤成功，以後唔使再喺市場上直接沽貨。李文化手持29.37%新怡，即使成手貨賣晒，對方都未必要提出全購。之前李主席叫價每股0.17元，相信𠵱家唔止呢個價。
數碼通（315）大派22億元股息外，又將股份溢價帳註銷轉入盈餘帳，令可供分派儲備增加42億元，擺明有計劃於今個財政年度繼續派特別股息。若每年派特別股息每股3.50元計，理論上42億元可派兩年，但可惜公司現金連債券組合只得17億元，除非經營現金回流強勁，否則今明兩個年度都好難再作慷慨分派。
阿虎