大凌集團（211）噚日朝突然停牌，由於同一班幕後人嘅數字地球（109）早前賣盤，小初起初以為大凌亦因賣盤而停牌，但經紀陳話唔係，佢話公司好似因為有單官司要停牌。
早排仙股同埋殼股炒得好厲害之時，大凌股價亦一度由0.02元升過上去0.029元，可惜公司有單關連交易未搞掂，加上先排又傳出大陸股東拗數事件，結果都係不成氣候。
市場就一直有傳聞，如果有人想要嘅話，大凌控制權可以有得傾。但今次又整單官非出嚟，如果短期搞唔掂，睇怕隻股真係有排唔使睇。
至於又係同一班幕後炒家嘅人人控股（059），噚日公布中期業績照舊蝕錢。
隻股早排亦因賣盤傳聞，股價曾經由唔夠0.04元升上0.067元，之後出現回吐，噚日就收0.059元，跌1.67%。
雖然呢隻股是非少好多，但經紀陳話，佢唔相信隻股賣盤可以在短期內搞掂，主要原因係人哋叫價相當高，唔易傾得成。
慕容小初