我大口羅拉覺得有冇得喺事業上發圍，都好講機緣巧合，相信做過恐怖片《死國》女主角同埋參演過《大逃殺》嘅日本青春女星栗山千明，都冇諗過自己可以有機會拍荷李活電影，今次佢重好彩到參演昆頓塔倫天奴（QuentinTarantino）套重頭作《標殺令》!
栗山千明呢次抽中支好籤，全靠已故日本導演深作欣二。因為昆頓本身係深作欣二嘅fans，就係睇完深作套《大逃殺》，喺入面發現一個外表幾cutie、殺起人嗰陣又好狠嘅栗山千明，所以特登搵佢演出《標殺令》。
昆頓睇嚟好明白日本人最興嗰家制服誘惑，所以佢亦叫無論影寫真定拍戲扮學生妹最耍家嘅栗山千明，喺《標殺令》入面再次以日本學生look上陣。
今次栗山喺戲入面比起《大逃殺》更加打得，佢扮演大奸角劉玉玲身邊嘅頭號馬仔GoGoYubari，一時揸住鐵鏈周圍飛，一時又揸住日本短刀，同女主角奧瑪花曼（UmaThurman）決鬥。不過，我羅拉收到風，由於套片下月頭先飛到本港，所以映期要押後到下月十六號。