爆機狂迷：
搶先測試《惡魔城》全3D新作

由紅白機年代陪住我哋成長嘅《惡魔城》，將首度登陸PS2，最惹人注目係首次使用全3D表達，感覺更有血有肉。香港KONAMI更提供內部測試版，供《蘋果》作率先測試，雖然完成度有限，不過畫面、動作嘅表現，都叫人印象難忘。

記者：朱崇德
逢星期一至日出版

對應機種：PS2
開發商：KONAMI
遊戲類型：動作
發售日期：11月27日
遊玩人數：1人
(c)1986-2003KONAMI&konami
ComputerEnterainmentTokyo

今次試玩《惡魔城》內部測試版，香港KONAMI限制頗大，如不能拍攝畫面、錄影等，純粹供傳媒試玩，惟有用外國發放之相片作輔助說明。試玩內容唔算太長，只有遊戲序章嘅外圍城堡，正式踏入惡魔城就GameOver。

3D演繹氣氛倍增
今集最突破係系列中首次全3D立體化，內容就講11世紀中古歐洲打殭屍，打法同配備當然好唔同啦！雖然只係測試版，不過遊戲流暢度好高，主角Leon在遊戲中暫時只有皮鞭同飛刀兩種武器，不過一直打落去會有新連招，若配合風同火等屬性，攻擊畫面更為華麗。到正式版時，再加埋有不同裝備、武器、魔導器嘅取得，相信打得重激！
至於畫面方面，人物設定同貼圖同樣做得非常細緻，用盡PS2機能，例如Leon一路行件衫會飄吓飄吓，場景圖細緻，再加光源變化和充滿感染力嘅配樂，絕對營造到古堡嘅恐怖氣氛！

經典武器攻略3D陷阱
講到《惡魔城》招牌特色，梗唔少得用足17年嘅長鞭，遊戲中亦會執到唔同道具Upgrade攻擊力，而且帶有冰、火、電及聖光等屬性，如何妥善調配將會係今次遊戲嘅重點。
呢條鞭唔單止可殺敵，重可以學元祖《惡魔城》咁用佢嚟過關，例如某啲高空地方，要靠條鞭盪嚟盪去，尤其係今作以全3D登場，好多場景及陷阱都會好刁鑽，若想順利發展劇情，熟悉鞭法絕對係致勝之道。另外聖水、十字架等經典輔助武器，喺今集亦健在，加埋其他魔導器，以應付唔同種類嘅敵人。

為救愛人力戰騎呢首領
潮流興「前傳」，今次《惡魔城》都走呢條舊橋，故事背景講Leon未婚妻Sara被古堡黑勢力捉去，為救愛人Leon犯險入城，從而交代踏上吸血鬼獵人之路。
故事主要分為5大版圖，分別為大教堂、花園、城堡地牢、煉金術士之研究室、地底洞窟。遊戲內不論嘍囉、中頭目同「大佬」設定都非比尋常，好似黑暗之后「五頭龍」、窮兇極惡嘅巨石怪等，差唔多將歐洲神話中嘅怪物，全部集合於古堡之內，打鬥場面超激烈！可惜測試版只有嘍囉冇大佬，只有文字交代。