田少組團上京，守得雲開終於「日破雲濤萬里紅」，田少笑到好似新郎哥咁。八方老友噚日同佢食早餐，講開自由黨個招牌𠵱家愈嚟愈搶手，佢老兄更加風騷。
田少話自由黨準備喺嚟緊十月搞個大型party，宣布黨嘅新定位。
既然要爭中產票，有人建議過改黨名，因為自由兩個字，對於阿爺，始終有啲啲權威，咁換主席又唔可以，惟有諗諗係咪可以改黨徽。
除咗包裝之外，自由黨近排好積極拉人入黨，譬如獨立議員劉炳章，八方相信佢入黨嘅機會都相當大。
查實自由黨上年已經搵過劉炳章，家陣舊事重提，田少噚日話係PC劉做主動，不過驚選民唔多鍾意，於是託田少寄信畀PC劉嘅選民講情。要注意嘅係，封信係PC劉幫田少寫埋，田少只係簽個名搞掂。
傳真︰2623-9278
電郵︰